Ish-drejtori i Policisë së Vlorës, Jaeld Çela, është liruar ditën e sotme nga qelitë e burgut të Fierit dhe është kthyer pranë familjes se tij. Gjykata e rrethit gjyqësor Fier, ka miratuar kerkesën e Çelës, për të përfituar lirimin me kusht nga burgu, pasi kishte vuajtur më shumë se 2/3 e dënimit. Gjykata e Posaçme të Apelit për Korrupsionin dhe Krimin e Organizuar, e dënoi Çelën, me vendim të formës së prerë më datë 4 shkurt 2022 sëbashku me ish-ministrin e Brendshëm Saimir Tahiri.
Kolegji i Gjykatës së Posaçme të Apelit për Korrupsionin dhe Krimin e Organizuar vendosi, lënien në fuqi të Vendimin nr. 60, datë 19.09.2019 të Gjykatës së Shkallës së Parë për Krimet e Rënda Tiranë, ku Jaeld Çela u dënua me 3 vite e 4 muaj burg, për akuzën e shpërdorimit të detyrës.
Kujtojmë se Prokuroria e Krimeve të Renda lëshoi një urdhër-arresti për ish-drejtorin e Policisë së Vlorës më datë 22 nëntor 2017. Policia nuk mundi ta arrestonte Çelen, pasi ai nuk u gjet në banesë, ndërsa u tha se ishte larguar jashtë vendit. Çela, iu shmang drejtësisë për më shumë se dy vite e gjysmë. Gjatë kësaj kohe, çdo përpjekje për arrestimin e tij, dështoi.
Ish-drejtuesi i policisë së Vlorës vendosi të dorëzohej vullnetarisht në drejtorinë e Policisë së Tiranës më 16 maj 2020. Nga ajo dite, Çela ka qëndruar në burg, deri mesditën e sotme, kur u lirua me kusht pas një vendimi të gjykatës së Fierit. Drejtuesi i lartë i policisë, ishte duke vuajtur dënimin në burgun e Fierit, sëbashku me ish-ministrin e Brendshëm Saimir Tahiri. Për këtë shkak, lirimi i tij u gjykua nga gjykata e Fierit, nën juridiksionin e secilës është burgu i këtij qyteti. Gjykata speciale e kishte dënuar Çelën me 40 muaj burg.
Por duke përfituar nga masa e sigurisë me burg, ku gjatë paraburgimit një ditë qëndrimi në izolim, llogaritet si një ditë e gjysmë burg, rezultoi se ai i kishte kryer tashme 2/3 e dënimit dhe mund të përfitonte liri me kusht. Aktualisht Çela kishte kryer 30 muaj burg dhe i kishin mbetur ende 10 muaj të tjerë izolim. Por për shkak të sjelljës korrekte në burg dhe vuajtjes të më shumë se 2/3 e dënimit, gjykata vlerësoi se Jaeld Çela duhet të kthehet pranë familjes, ndërkohë që do të mbikqyret nga drejtoria e Shërbimit të Provës.
Jaeld Çela ka drejtuar Policinë e Vlorës nga shtatori 2014, deri në prill të 2017-s. Ndërsa më parë ka drejtuar Drejtorinë e Policisë së Qarkut Durrës, si dhe ka shërbyer për më shumë se 17 vite në radhët e Policisë së Shtetit. Jaeld Çela u emërua në krye të Policisë se Vlorës, kur ministër i Brendshëm ishte Saimir Tahiri.
Ndërkohë, ish-ministri i brendshëm Saimir Tahiri, vazhdon te vuaj dënimin me 40 muaj burg, në Institucionin e Vuajtjes së Dënimit Fier. Si Tahiri ashtu dhe Çela, kanë bërë rekurs në Gjykatën e Lartë dhe kërkojnë pafajësi për akuzën e shpërdorimit të detyrës. Çështja e tyre ende nuk është marrë në shqyrtim nga Gjykata e Lartë.
Discussion about this post