Një ngjarje e rëndë ka ndodhur këtë mbrëmje në qytetin e Pejës. Nga të shtënat me armë zjarri, dy persona kanë mbetur të vdekur dhe një tjetër është plagosur.
Ngjarja ka ndodhur rreth orës 20:20, afër Shkollës së mesme ekonomike “Ali Hadri” në Pejë. Telegrafi mëson se njëri nga ta është Astrit Ademaj, kandidati për kryetar të komunës së Pejës nga Partia Demokratike e Kosovës (PDK), si dhe ish-kandidati i kësaj partie në Deçan, Blerand Kadriaj.
Dy viktimat dyshohet se kanë qenë në një lokal dhe për një moment kanë sulmuar njëri-tjetrin. Dyshohet se Ademaj e Kadriaj kanë hapur zjarr ndaj njëri-tjetrit, duke mbetur të vrarë.
I plagosur nga shkrepja e armëve ka mbetur vëllai i Astrit Ademajt, Avniu.
Njësitet e policisë kanë dalë në vendin e ngjarjes dhe po merren me rastin.
