Ka humbur jetën në moshë të re sot biznesmeni dhe politikani, Ilir Dashi. Lajmin e kanë bërë të ditur në rrjetet sociale miqtë e tij. Ilir Dashi ka mbajtur disa pozicione drejtuese, përfshi edhe Drejtorin e QSUT-së, ndërsa në politikë ishte i angazhuar në radhët e LSI, ku ka drejtuar edhe degën e kësaj partie në Tiranë.
Dashi gjithashtu ka qenë i angazhuar vite më parë në kinematografinë shqiptare, ku ka luajtur në disa role filmash.
Kujtojmë se një vit më parë, si ish-drejtuesi i Përgjithshëm i Hekurudhave Shqiptare, Dashi është marrë nën hetim nga Prokuroria e Durrësit për “shpërdorim detyre”, nën dyshimet se i ka shkaktuar shtetit një dëm ekonomik në vlerë rreth 10 milionë lekë të reja. Gjykata e Durrësit ka vendosur ndaj Dashit fillimisht masën e sigurisë “arrest në shtëpi” dhe më tej, ka pranuar kërkesën e prokurorisë së qytetit bregdetar, duke caktuar “detyrim për paraqitje”.
