Pa mbaruar festat e fundvitit në Tiranë, Erion Veliaj i është futur përgatitjeve për eventet e radhës. Blerja e skenave për këto festa është një industri fitimprurëse për disa kompani që kanë “lulëzuar” me ardhjen e Erion Veliajt alias Lali Eri në krye të bashkisë.
Këtë herë, Lali Eri ka hapur tenderin me objekt “Blerje shërbim artikuj të ndryshme për evente”, për të cilin ka vendosur të shpenzojë 75 milionë lekë. Sipas të dhënave në dokumentet standarde të tenderit, do të blihen pajisje për ngritjen e një skene koncerti, kryesish shkallë, skela, Led Wall, ndriçues.
Dhe ajo që na bën më shumë përshtypje është se do të blihen edhe 24 fuçi 1000 litërshe. Nëse do të përshkruhej se për çfarë feste apo aktiviteti do të blihen këto materiale, do të jepnim një shpjegim për fuçitë, por tani për tani nuk ka detaje.
Duke para afatin e kontratës që është përcaktuar 2 muaj, mund të hamendësojmë se kjo skenë ngrihet për festën e Ditës së Verës (14 mars). Por, duket që një pjesë e mirë e materialeve që janë në listë, janë përfshirë kot, sa për t’i rritur xhiron kompanisë fituese.
Mund të jetë edhe Festa e Shën Valentinit, apo ndonjë ditë ndërkombëtare që nuk na vjen ndërmend, gjithsesi këto evente nuk ka bindin se duhen harxhuar kaq lekë për fuçi, trarë e skela.
Dhe përveç kësaj, Lali Eri e ka dhuruar kontratën me fondin 75 milionë lekë, sepse tenderin e ka dhënë pa garë fare. Në fazën e parë kanë paraqitur ofertë 4 kompani, 3 prej të cilave janë eliminuar për mungesë dokumentesh që mund të zgjidheshin gjatë procesit. Kështu, në fund mbeti vetëm zarfi me ofertës e firmës “SCREEN AD”, e cila propozonte 74 milionë lekë (pa TVSH).
Megjithëse me ofertën më të shtrenjtë, firma në fjalë nënshkroi kontratën sepse Lali Eri eliminoi konkurrencën.
Tenderi i mësipërm është vlerësuar me “Flamur të kuq” nga Open Data Albania, shenjë që tregon riskun e lartë të korrupsionit.
Sakaq vlen të përmendim se “SCREEN AD” ka si pronarë dy aktorë të njohur shqiptar Edmond Topi, që tashmë është drejtor festivalit ndërkombëtar të filmit “Dea open air” dhe vazhdon të merret me bashkimin e talenteve të aktrimit.
Bashkëpronar me të është Eptan Lohja, ku më së shumti njihet nga roli i tij në filmin “Në shtëpinë tonë”. Edhe Eptani, si shumë nga kolegët e tij, nuk e vazhdoi rrugën e artit, por mori një tjetër drejtim në jetë. Studimet e larta i kreu për Inxhinieri dhe punon prej 16 vitesh si Drejtor Marketingu në një televizion, gjithashtu merret edhe me biznese të tjera private.
Ndërsa kjo kompani ka si firmë mëmë ‘ASK 4 entertainment’, me administratore Arnita Beqiraj, ish-Miss Shqipëria 2010, por që tani merret me biznese reklamash dhe evenimentesh.
E dimë tashmë që bashkëpunimi me artistë të dashur për publikun, është një strategji publiciteti që përdor Lali Eri për të kuruar imazhin e tij të implikuar nga korrupsioni.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post