Eco-ELB firma që menaxhon inceneratorin e Elbasanit vazhdon të thithë para për punë që nuk kryhen, ndërkohë që nuk iu ndahet tenderëve abuzivë. Kujtojmë se në 2023, Gijotina.com ka raportuar se si Administratori Leli Kaja i bën rrush e kumbulla fondet nën hundën e SPAK, që e ka inceneratorin nën sekuestro.
Fjala është me tenderin me objekt “Monitorimi i parametrave mjedisore dhe hartimi i raporteve mjedisore, për landfillin”, me fond limit 6.000.000 lekë të reja (pa TVSH)”, i cili është i ndarë në dy lote me vlerë 30 milionë lekë secili. Për këtë procedurë janë bërë disa denoncime, por këtë radhë po raportojmë ankesën e bërë së fundmi në Komisionin e Prokurimit Publik.
Kjo ankesë lidhet me lotin 2 të këtij projekti. Sipas dokumentit që disponojmë thuhet se, në datën 11.03.2024 pranë Komisionit të Prokurimit Publik, është administruar ankimi elektronik e operatorit ekonomik “Eko-Studio-Projekt” SHPK për procedurën e prokurimit me objekt “Monitorimi i Parametrave Mjedisore dhe Hartimi i Raporteve Mjedisore për Landfillin”, me fond limit 3,000,000 lekë pa TVSH, zhvilluar më datë 20.02.2024, nga autoriteti kontraktor, ECO-ELB SHA.
Ankimuesi pretendon se Eco Elb ka vendosur kritere diskriminuese në këtë tender, të cilat mund t’i përshtaten vetëm firmës QENDRA E MONITORIMIT TE MJEDISIT, e cila është shpallur fituese pa konkurrencë. Ndërsa më tutje në ankesë thuhet se Autoriteti Kontraktor as nuk i ka shqyrtuar ofertat e tjera dhe çdo pretendim ankimuesi e shoqëron me argumentet dhe dokumentet përkatëse. Autoriteti Kontraktor as nuk e ka marrë në konsideratë ankesën, por shpresojmë që KPP do bëjë punën e vet dhe ta analizojë këtë çështje në detaje.
Shohim që ky tender mban “Flamurin e kuq”, të vendosur nga Open Data Albania për riskun e korrupsionit.
Në fakt, për këtë lot kanë paraqitur oferta 4 firma, por Kaja ka zgjedhur që tri prej tyre t’i përjashtojë që në fazën e parë duke i eliminuar konkurrencën firmës QENDRA E MONITORIMIT TE MJEDISIT.
Për këtë prokurim është bërë edhe një denoncim në vitin e shkuar. Ka qenë firma “Tenuis Laboratories” SHPK ajo e cila ka denoncuar pranë KPP, ku theksonte se Eco-Elb ka vendosur në tender kritere diskriminuese që pengojnë konkurrencën e drejtë.
Pika e parë që evidenton denoncuesi është se Kaja kërkon që operatori duhet të ketë dy automjete për të bërë transportin, por nuk jep opsionin që këto dy automjete të jenë edhe me qira, veprim i cili përjashton automatikisht disa kompani.
“Komisioni i Prokurimit Publik gjykon, se referuar testit të proporcionalitetit, kërkesa e autoritetit kontraktor për disponimin e dy pajisjeve matëse për çdo parametër, shkon përtej asaj se çfarë është e nevojshme për realizimin e synimit të kërkesës së autoritetit kontraktor”, shpjegon KPP.
Gjithashtu, ankimuesi kërkon të ndryshohet pika ku kërkohet që “Operatori duhet të ketë një laborator të akredituar nga Drejtoria e Përgjithshme e Akreditimit, sipas ISO/IEC 17025, për matjen e parametrave të mikroklimës, zhurmës”.
Edhe sikur ky tender të zhvillohej duke zbatuar me korrektësi ligjin, të revolton harxhimi i parave publike për matjen e parametrave mjedisorë të landfillit pas mega skandalit që ka ndodhur me këtë incenerator. Të gjithë e dimë se inceneratori nuk punon dhe landfilli është i tejmbushur me plehra. Çfarë do të monitorohet aty?
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post