Në pistën suedeze të Are, u zhvillua sot gara e radhës e Kupës së Botës për femra në ski, ajo e sllallomit gjigand, ku garoi edhe Lara Colturi. Skiatorja kuqezi u klasifikua në vendin e tretë, duke u ngjitur në podium.
Ky është podiumi i tretë sezonal për skiatoren 18-vjecare kuqezi, që pas dy vendeve të dyta siguroi sot edhe një të tretë. Një tjetër paraqitje e shkëlqyer e Colturi, që nderoi sërish flamurin kuqezi këtë sezon.
Pas zbritjes së parë, Colturi u klasifikua në vendin e katërt, duke dhënë kohën 57”04, ndërsa në zbritjen e dytë dha kohën 57”06. Në total, ajo e mbylli garën me kohën e përgjithshme 1’54”10, duke fituar një pozicion.
Lara Colturi tregoi edhe një herë një formë të mirë, duke rivalizuar me skiatoret më të mëdha në moshë. Garën e fitoi Federica Brignone e Italisë (1’52”67), ndërsa e dyta u rendit Alice Robinson e Zelandës së Re.
Discussion about this post