Shqipëria po boshatiset, nga një vend shprese është kthyer në një vend që të shuan ëndrrat. Qeveria e vendit i detyron qytetarët të largohen, duke i lënë në harresë. Deputeti i Partisë Demokratike Arbi Agalliu, ka publikuar shifrat e Eurostat për sa i përket numrit të personave të larguar, që kanë braktisur vendin tonë e kanë përfituar leje qëndrimi në Europë.
Në reagimin e Agalliut, bëhet me dije se numri i të larguarve është shumë herë më i madh, pasi 700 mijë janë vetëm ata që janë pajisur me leje qëndrim në vendet ku janë vendosur. Shqipëria po boshatiset e është kthyer në një vend që shuan ëndrrat e të rinjve. Faji për këtë fenomen tejet shqetësues është vetëm i qeverisë së vendit, e cila nuk ka asnjë strategji për t’i mbajtur shqiptarët këtu. Më tej deputeti i akuzon qeverinë se kjo e fundit nuk ka asnjë plan masash për të zhvilluar rininë dhe për të nxitur tek ata sipërmarrjen.
Mbështetja ndaj bizneseve është një tjetër temë e përmendur, ku bëhet me dije se nuk ka asnjë plan lehtësues për të rritur qarkullimin e kapitalit. Gjithashtu e njëjta gjë ndodh dhe me familjet në nevojë, të cilat lihen mes vuajtjeve, ku më pas detyrohen ta braktisin vendin.
Nga viti 2008 deri në 2020-n, janë rreth 700 mijë shtetas shqiptarë që kanë marrë leje qëndrimi në një nga shtetet e Bashkimit Europian. Numri më i lartë i lejeve të qëndrimit është dhënë në periudhën 2008-2009, me përkatësisht 97.3 mijë dhe 83.9 mijë, si rrjedhojë e emigracionit të lartë të fillim viteve 2000. Shtimi i ndjeshëm i kërkesave për azil solli një tjetër rritje të lejeve të qëndrimit, që kulmoi në vitin 2019, me rreth 60.4 mijë të tilla. Shqipëria mban rekordin për numrin e shtetasve të saj që kanë zgjedhur të jetojnë e punojnë në një shtet të Bashkimit Europian. Për të njëjtën periudhë (2008-2020) kanë marrë leje qëndrimi për herë të parë rreth 426 mijë serbë, 337 mijë boshnjakë, 285 mijë shtetas të Kosovës, 195 mijë nga Maqedonia e Veriut dhe më pak se 20 mijë nga Mali i Zi.
Gati 25% e popullsisë shqiptare (të vitit 2020) tashmë jeton e punon në një nga vendet e Bashkimit Europian. Vendi i dyte pas nesh është Kosova (15.4%), e ndjekur nga Bosnjë-Hercegovina (10.3%), Maqedonia e Veriut (9.4%), Serbia (6.2) dhe Mali i Zi (3.3%).
Në vitin 2020 morën leje qëndrimi për herë të parë në një nga vendet e Bashkimit Europian 37,592 shtetas shqiptarë, sipas Eurostat.
52% e tyre e morën për arsye familjare, 16% për punë, 3% për edukim dhe më pas renditen arsye të tjera, pa u specifikuar.
