Vendi ynë mban rekord për sa i përket mjekëve që largohen nga vendi për të punuar në BE. Ky largim në masë po sjellë mangësie personeli në qendrat shëndetësore. Këtë shqetësim e ngre edhe rektori i Universitetit të Mjekësisë, Arben Gjata, i cili thotë se nga 40 kuota, vetëm 5 studentë kanë aplikuar për mjek familjeje. Sipas tij, në dy vitet e fundit ka filluar të ndihet mungesa e mjekëve të urgjencës.
“Ne kemi shumë nevojë për disa specialitete siç është mjeku i urgjencës dhe mjekësia e familjes. Në sistemin shqiptar shumica e mjekëve nuk janë mjek familje por janë mjek të përgjithshëm që kanë punuar ndër vite si mjek familje. Dhe gjithashtu sistemi urgjencës, pra duam të formojmë edhe mjekë të urgjencës. Te mjeku familjes kishim 40 kuota dhe u plotësuan vetëm 5 ndërsa te urgjenca kanë qenë 15 kuota dhe u plotësuan 5 gjithashtu”, u shpreh Gjata.
Për t’u dhënë zgjidhje mungesave të krijuara për shkak të largimit të mjekëve, Rektori i Universitetit të Mjekësisë Arben Gjata thotë se gradualisht do të rriten kuotat për disa degë të mjekësisë. “Unë besoj se kuotat gradualisht do ti rrisim, ne projektojmë rreth 500-600 kuota në vit duhet ti ketë mjekësia për të përballuar qoftë lëvizjen e mjekëve jashtë vendit qoftë dhe për të plotësuar nevojat në rritje të sistemit qoftë atij publik qoftë sistemit privat”, tha rektori. Një tjetër zgjidhje është parashikuar përmes shtrirjes së degëve të Universitetit të Mjekësisë, edhe në Durrës dhe Elbasan.
Discussion about this post