Deputetja e Partisë Demokratike Lindita Metaliaj ka njoftuar se është larguar nga pozicioni që mbante si anëtare e kryesisë së PD, njoftim që e ka dhënë ditën e djeshme në mbledhjen e grupit parlamentar. Metaliaj i është bashkuar listës së deputetëve që i kanë kërkuar Bashës të dorëhiqet nga posti i kreut të PD si zgjidha e vetme për bashkimin e demokratëve.
Në postimin e saj në Facebook, deputetja ka theksuar se vendimet duhen marrë me bazën dhe për bazën dhe të çojë propozimet e anëtarësisë në qendër dhe jo vendimet e qendrës te anëtarësia.
“Sot në mbledhjen e Grupit Parlamentar deklarova se jap dorëheqjen nga anëtare kryesie e PD, të vetmin post drejtues në organet e Partisë Demokratike. E paraqita dorëheqjen sepse unë dua që vendimet ti marr me bazën dhe për bazën, të çoj vendimet dhe propozimet e anëtarësisë në qendër dhe jo vendimet e qendrës te anëtarësia. Deklarova gjithashtu se duhet bashkim dhe duhet të mbahemi mend si grupi parlamentar që bashkoi partinë, bashkoi demokratët dhe jo si grupi që përçau thellë partinë. Partia Demokratike është Aset Kombëtar dhe duhet të mos mbetet peng i interesave personale të askujt por të ringrihet e të funksionojë në interes të demokratëve dhe të shqiptarëve”, shkruan Metaliaj.
Mbledhja e grupit parlamentar ditën e djeshme është shoqëruar me debate të forta mes deputetëve dhe Bashës, pasi ky i fundit ka refuzuar të dorëhiqet nga posti i kreut të PD, ndonëse mbështetësit e tij numërohen me gishtat e dorës.
Discussion about this post