Lazio vazhdon serinë fantastike në kampionat. Skuadra kryeqytetase ka triumfuar 2-1 ndaj Cagliarit në “Stadio Olimpico”, duke regjistruar fitoren e gjashtë radhazi në Serie A dhe duke u ngjitur në krye të renditjes, me tri pikë avantazh ndaj ndjekësve të Interit.
Takimi nisi me ritëm të lartë, me të dyja skuadrat që krijuan raste për shënim. Megjithatë, ishte Cagliari që kaloi i pari në avantazh. M’Bala Nzola përfitoi nga një krosim i Alieu Fadera dhe dërgoi topin në rrjetë, duke befasuar vendasit.
Reagimi i Lazios ishte i menjëhershëm. Tijjani Noslin shërbeu për Gustav Isaksen, i cili me një goditje të bukur realizoi golin e barazimit, të katërtin personal në pesë ndeshjet e fundit.
Në pjesën e dytë, të dyja skuadrat kërkuan golin e avantazhit, por momenti vendimtar erdhi në minutën e 83-të.
Dy futbollistë të aktivizuar nga stoli bashkëpunuan në mënyrë perfekte: Alfonso Pedraza dërgoi një top në zonë, ndërsa Andrea Pinamonti e shndërroi në gol me një goditje me kokë, duke shpërthyer festën në “Olimpico”.
Situata u vështirësua edhe më shumë për miqtë, pasi Adam Obert u ndëshkua me kartonin e dytë të verdhë dhe la Cagliarin me dhjetë lojtarë.
Me këtë sukses, Lazio konfirmon momentin e shkëlqyer, duke regjistruar fitoren e nëntë në dhjetë ndeshjet e fundit të kampionatit, me vetëm një barazim.
Nga ana tjetër, Cagliari pëson humbjen e katërt radhazi.
Lazio po konfirmohet gjithnjë e më shumë si një pretendente serioze për titullin kampion në Itali.
Discussion about this post