Lëvizja Demokratike e Kosovës ka tërhequr votat për shpalljen e Erion Veliajt, “Qytetar Nderi” i komunës së Prizrenit me argumentin se nuk e ka trajtuar mirë figurën e ish-Presidentit Ibrahim Rugova. Reagimi iI LDK-së vjen pasi Veliaj i hoqi emrin e ish-Presidentit Ibrahim Rugova, një pjese të rrugës që mbante emrin e tij dhe e emërtoi “Dëshmorët e 4 Shkurtit”.
Vendimi i kryebashkiakut të Tiranës Erion Veliaj, për t’i hequr një pjese të rrugës, emrin e ish -Presidentit Ibrahim Rugova dhe për ta emërtuar këtë rrugë, “Dëshmorët e 4 shkurtit”, ka sjellë reagime të forta në Kosovë.
Së fundmi, Lëvizja Demokratike e Kosovës është penduar për votat që ka dhënë për shpalljen e Erion Veliajt si “Qytetar Nderi” në Prizren duke i tërhequr votat e tyre.
Shefi i LDK-së, në emër të anëtarëve të LDK-së në Kuvendin e Komunës së Prizrenit, Haziz Hodaj deklaroi se votat janë tërhequr pasi Veliaj nuk e ka trajtuar mirë figurën e ish- Presidentit të Kosovës, Ibrahim Rugova.
Veliaj e ka shkatërruar kohët e fundit një rrugë me emërtimin e Rugovës. Po ashtu një shtatore, me vite qëndron në depo, prandaj e tërheqim votën për shpalljen e tij “Qytetar Nderi” i Prizrenit”.”, u shpreh ai.
Hodaj paralajmëroi se anëtarët e LDK-së nuk do të marrin pjesë në ceremoninë e dhënies së titullit “Qytetar Nderi” për Veliaj, një ceremoni që parashikohet të mbahet më 17 shkurt, datë që shënon 15- vjetorin e shpalljes së pavarësisë së Kosovës.
Më 17 shkurt të vitit 2012 rruga që nis prej Bankës së Shqipërisë deri në hyrje të Liqenit Artificial, mori emrin “Ibrahim Rugova” në nder të ish-Presidentit të Kosovës. Por dy ditë më parë, kryebashkiaku i Tiranës vendosi ta copëzonte këtë aks dhe një pjese të rrugës t’i vendoste emrin “Dëshmorët e 4 Shkurtit”.
Discussion about this post