Gazeta prestigjioze franceze Le Monde i ka kushtuar një artikull koncertit të reperit amerikan Kanye West, i planifikuar për t’u mbajtur më 11 korrik në Tiranë, duke e lidhur ngjarjen me situatën politike dhe protestat që po zhvillohen në Shqipëri.
Në artikull, Le Monde shkruan se “reperi amerikan Kanye West, i cili është person non grata në shumicën e vendeve evropiane për shkak të shpërthimeve të tij neonaziste dhe antisemite, do të pritet me krahë hapur të shtunën, më 11 korrik, në Tiranë, nga një qeveri shqiptare që aktualisht përballet me kundërshtim të fortë në rrugë”.
Gazeta franceze më tej shkruan se “Kryeministri i këtij vendi të vogël ballkanik, socialisti Edi Rama, njoftoi më 6 korrik se do të lëshonte “urgjentisht” një subvencion prej 4 milionë eurosh për të shpëtuar koncertin e yllit kontrovers amerikan, i cili është planifikuar të zhvillohet në periferi të Tiranës.
Njoftimi shkaktoi zemërim midis mijëra protestuesve që janë mbledhur çdo natë që nga fundi i majit jashtë zyrës së kryeministrit për të kundërshtuar projektet luksoze në Zvërenc.
“Kanye West është një antisemit famëkeq. Dhe tani qeveria do të shpenzojë 4 milionë euro që koncerti të mund të zhvillohet”, citon gazeta aktivistin Edison Lika.
Një nga vendet më të varfra në Evropë
Më tej Le Monde shkruan: Duke bërë një paralele me mungesën e madhe të fondeve për spitalet në atë që është një nga vendet më të varfra të Evropës, shumë protestues e shohin koncertin dhe subvencionin si një tjetër simbol të mënyrës se si kryeministri i tyre, i cili ka qenë në pushtet që nga viti 2013, ka marrë kontrollin e të gjitha institucioneve për t’i shërbyer imazhit të tij dhe herë pas here interesave të dyshimta.
“Duke argumentuar se koncerti “rrezikonte të anulohej përndryshe”, udhëheqësi shqiptar e ka mbrojtur subvencionin si të nevojshëm “për të mos turpëruar Shqipërinë”, duke theksuar se “25,000 të huaj” pritej në kryeqytet për ngjarjen, e cila mund të gjeneronte “100 milionë euro” për sektorin e turizmit”, vijon më tej shkrimin e saj Le Monde.
Reperi amerikan, i njohur edhe si “Ye”, ka anuluar shumicën e koncerteve të tij në Evropë që kur deklaroi në vitin 2023 se “i do nazistët” dhe publikoi një këngë të titulluar “Heil Hitler” më 8 maj 2025 – 80 – vjetori i humbjes së Gjermanisë në Luftën e Dytë Botërore.
Edhe pse reperi shprehu në janar se “ndjente keqardhje të thellë” për vërejtjet e tij antisemite – të cilat ia atribuoi çrregullimit të tij bipolar – ai u detyrua të shtynte koncertin e tij të qershorit në Marsejë dhe iu ndalua hyrja në Mbretërinë e Bashkuar në fillim të prillit. Megjithatë, ai arriti të performonte për dy netë në fillim të qershorit në Holandë.
Sipas Le Monde ka qenë vetë kryeministri Edi Rama që ka ftuar reperin amerikan, duke e njoftuar ardhjen e tij në fund të prillit.
“I vetëshpallur pro-amerikan i vendosur, udhëheqësi shqiptar ka bërë gjithçka për t’i shërbyer interesave të Trump, siç tregohet nga mbështetja e tij e vazhdueshme për projektet e pasurive të patundshme të familjes Trump dhe ky koncert nga një reper i njohur për afërsinë e tij me presidentin amerikan. Koncerti do të zhvillohet në një vend të ndërtuar posaçërisht për këtë rast, të cilin kryeministri e vizitoi personalisht të martën. Fillimisht, qeveria u zotua se eventi nuk do t’i kushtonte asgjë publikut, por që atëherë ka ndryshuar kurs, edhe pse biletat – që shiten për midis 250 dhe 700 euro – mbeten kryesisht të pashitura”, mbyll artikullin gazeta franceze.
Discussion about this post