10 ditë para nisjes së sezonit të ri Parlamentar, një tjetër deputet i dalë nga zgjedhjet e 25 prillit ka dhënë dorëheqjen nga mandati.
Lefter Koka ka dhënë dorëheqjen nga mandati i deputetit në qarkun e Durrësit. Lajmin e ka bërë të ditur përmes një postimi në Facebook, teksa shkruan se është dita që rrugëtimin e tij politik ta vazhdojnë bashkëpunëtorët e tij.
“2 dekada më parë me përgjegjësi të lartë publike, mora përsipër të garoja për të qenë zëri qytetarëve durrsakë. Në këtë rrugëtim plot sfida, suksese e padiskutim dhe dështime, pata fatin të dëshmoj fuqinë e besimit, si dhe dinjitetin e njerëzve që punojnë çdo ditë me ndershmëri dhe përkushtim për një të ardhme më të mirë. Në morinë e sfidave me të cilat ky rrugëtim të përball është gjithmonë e vështirë të ndalesh një moment dhe të vlerësosh se kur është koha e duhur për të mbyllur një cikël.
Sot është dita që rrugëtimin tim politik, ta vijojnë ata mijëra bashkëpunëtorë të mitë, që më bënë fitues për vite me rradhë dhe që mbase nuk kam mundur asnjëherë t’i falenderoj sa duhet. Sot, e ardhmja u përket atyre”!
Ndër të tjera, ai shkruan se me vendim e tij është njohur KQZ si dhe Kuvendi i Shqipërisë, ndërsa shpreh mirënjohjen për rolin e deputetit.
“Me këtë vendim timin, është njohur institucionalisht si Komisioni Qendror i Zgjedhjeve ashtu edhe Kuvendi i Shqipërisë.
Së fundmi, mirënjohje të madhe për mundësinë , besimin dhe privilegjin e jashtëzakonshëm që më është dhënë t’i shërbej me përkushtim qytetit, vendit dhe njerëzve që dua!
Shqipëria është padyshim sot një vend më i mirë se dje, është vendi plot dritë shprese që na përket të gjithëve”, shkruan Koka.
Lefter Koka u rendit i shtati në listën e PS për qarkun e Durrësit, ku arriti të siguronte 9609 vota.
