Legalizimi i kanabisit në Gjermani është një temë e cila po qarkullon së fundmi, madje duke u kthyer në një diskutim të gjerë në vend.
Aktualisht lejohet vetëm kanabisi mjekësor me recetë e rregulla të rrepta, pjesa tjetër e tregtisë është ilegale. Rreth tij kanë diskutuar dhe 3 partitë që zhvillojnë bisedimet për koalicionin e ardhshëm qeveritar. Për të Gjelbrit gjermanë, që kanë si model Kanadanë, është më mirë që kanabisi të legalizohet dhe të ketë kontroll. Si të Gjelbrit edhe liberalët mbështesin legalizimin e kanabisit në dyqane të licencuara për përdorim vetjak te të rriturit. Socialdemokratët tregohen të hapur për këtë legalizim, por do ta testojnë këtë njëherë në projekte model tek të rriturit. SPD thotë në programin e saj, se konsumi i kanabisit është “realitet shoqëror”, prandaj për këtë do gjetur një përgjigje adekuate politike.
Ka pasur shumë ekspertë të cilët kanë shprehur mendimet e tyre në lidhje me legalizimin e kanabisit në vend, ku një pjesë janë pro vendimit e pjesa tjetër e kundërshtojnë duke listuar arsyet.
Gjyqtari Andreas Müller tha për Deutschland funk, se ka ardhur koha që të dekriminalizohet kanabisi, sepse sipas tij alkooli është shumë herë më i rrezikshëm. Madje gjyqtari Müller e ka çuar çështjen edhe për trajtim në Gjykatën Kushtetuese. Sipas tij, 70.000 të vdekur në vit, regjistrohen vetëm në Republikën Federale Gjermane nga alkooli. Në të gjithë botën asnjë të vdekur nga kanabisi.
Maximilian Gahr, kryemjek në Klinikën Universitare të Ulmit, Dega e Psikiatrisë dhe Psikoterapisë, thotë për “Ëelt” se “ka studime, sipas të cilave, përdorimi i hershëm i kanabioideve tek të rinjtë, ka mundësi të shkaktojë pasoja të rënda, për shkak se zhvillimi i trurit ende nuk është përfunduar.” Sipas Gahr pasojat janë ndryshimi i strukturës së trurit, sfera të caktuara në tru, si psh korteksi mund të zvogëlohen, me pasojë ndryshim të aftësisë mendore tek të rinjtë.
Sipas mediave atje, pritet që të bëhet një eksperiment i cili më pas do të konfirmojë rezultatet e kanabisit. Industria farmaceutike gjermane aktualisht e merr kanabisin mjekësor nga jashtë. Trajtimi i dhimbjeve kronike me kanabis mjekësor ndodhet në një marrëdhënie tensionuese në rritje të interesave financiare të shpresave të të prekurve dhe një efektiviteti të paprovuar”, është shprehur, Frank Petzke, drejtues i Komisionit të Kanabisit Mjekësor. Vetëm në gjysmën e këtij viti është dhënë me recetë kanabis në vlerë 90 milionë euro në Gjermani.
Kujtojmë që, kanabisi përdoret për trajtimin e formave të epilepsisë, në rastin e sklerozës së shumëfishtë, si edhe në rastet e të vjellave pas kimioterapisë.
