Legjenda e skuadrës së Dinamos, Muhedin Targaj ka theksuar se kryeqytetasit janë ndërtuar për titullin kampion. Ai u shpreh se nevojitet pak koh derisa skuadra të arrijë formën maksimale.
“Mua më pëlqen kjo Dinamo. Nuk nisem aspak nga rezultati i derbit apo nga ai i ndeshjeve të tjera. Unë shoh atë që ekipi bën në fushë dhe mendoj se kjo skuadër di të luajë futboll të bukur, futboll me nivel. Mendoj, madje jam i bindur, se Dinamo do të ecë dhe do të jetë mes pretendentëve për titullin. E them këtë, sepse kur një ekip di të luajë futboll, rezultatet do të vijnë patjetër. Ndoshta duhet vetëm pak durim, sepse janë lojtarë që janë bashkuar vetëm pak muaj më parë. Të jem i sinqertë nuk e prisja të ishte në këtë nivel, siç e pashë në derbin me Partizanin, një kundërshtar shumë i fortë. Ne po shohim që edhe Mesi, që është Mesi, shkon në Francë dhe nuk po arrin të bëjë atë lojën e tij të zakonshme. Pra, me kalimin e kohës skuadra do të rritet me siguri, sepse shenjat i ka dhënë qartë me lojën që zhvillon. Dhe nuk është vetëm derbi, por edhe me Teutën, edhe me Laçin ka bërë lojë. Mund të humbasë, sepse futbolli kështu është, por patjetër që do të ketë ecuri të mirë këtë sezon”, tha ish-futbollisti i Dinamos, Muhedin Targaj.
