Një pjesë e lojtarëve të Kombëtares do të luajnë ditën e sotme me skuadrat e tyre dhe priten të jenë edhe titullarë.
Talenti i ‘Kuqezinjve’, Nedim Bajrami është duke bërë shumë mirë me Empolin dhe sot në ndeshjen e orës 20:45 kundër Interit për javën e dhjetë të Seria A, shqiptari pritet të jetë në vendin e titullarit.
Teksa nuk dihet nëse Ardian Ismajli do të jetë pjesë e formacionit të sotëm pas autogolit në takimin me Salernitanën, teksa edhe për talentin 19-vjeçar, Kristjan Asllani nuk dihet nëse do ketë apo jo minuta në dispozicion.
Skuadra e mesfushorit renditet në vendin e dhjetë me 12 pikë, ndërsa kundërshtarët e tyre të këtij raundi ndodhen të tretët me 18 pikë.
Po në të njëjtën orë sot do të përballet Laizo me Fiorentinën, skuadra e tre shqiptarëve Thomas Strakoshës, Elseid Hysajt dhe Vedat Muriqit vjen në raundin e dhjetë pas disfatës së rëndë me Veronën me rezultatin 4-1.
Në atë takim Hysaj ishte titullar, por qëndroi në lojë për vetëm 23 minuta, ndërsa Strakosha dhe Muriqi u lanë në stol.
Ndërsa sot nuk dihet nëse ndonjëri prej shqiptarëve që luajnë me Kombëtaren ‘Kuqezi’ dhe atë ‘Dardane’ do të jenë në formacion apo do të kenë minuta aktivizimi.
Lazio renditet në vendin e tetë me 14 pikë, ndërsa kundërshtarët e tyre të sfidës së sotme janë të shtatët me një pikë më shumë.
Po sot do të zhvillohet edhe ndeshja midis Sampdorias dhe Atalantës, me këta të fundit që do të vuajnë mungesën e mbrojtësit ‘Kuqezi’ Berat Gjimshitit, i cili theu dorën në ndeshjen e Kombëtares në transfertë me Poloninë.
Teksa duket se edhe mbrojtësi tjetër i përfaqësueses sonë, Marash Kumbulla do e bëjë pushim, pasi është parë tashmë që trajneri Jose Mourinho nuk do fare shqiptarin dhe maksimumi që mund të marrë në ndeshjen e Romës me Cagliarin në transfertë duket se është stoli.
Nga ana tjetër skuadra e Ivan Balliut, Rayo Vallecano do të ndeshet me Barcelonën sot në orën 19:00 për raundin e 11 të La Ligas. Kështu mbrojtësi ‘Kuqezi’ do të ndeshet me klubin ku ai u formua si lojtar dhe në një intervistë të dhënë së fundmi për median katalanase ‘Sport’ ai u shpreh se Barça do të jetë gjithmonë një kundërshtar i fortë pavarësisht situatës së vështirë ku ndodhet aktualisht.
Shqiptari e ka gjetur veten mirë te Vallecano dhe pritet që këtë sfidë ta nisë që nga minuta e parë. Aktualisht ekipi i Balliut renditet më mirë së Barça, në vend të tetë më 16 pikë, një më shumë se katalanasit e vendit të nëntë./K.T/Gijotina.com
