Këshilli Kombëtar i Territorit dhe Urbanistikës (KKTU) ka refuzuar sot 26 leje ndërtimi, mes tyre edhe një projekt të kompanisë “Arlis sh.p.k”, një vendim që vjen në një moment kur kjo kompani është në qendër të një skandali të fortë publik.
Vetëm pak ditë më parë, më 14 prill, një pallat i ndërtuar prej kësaj shoqërie në pronësi të Armand Lilos, lidhje familjare me deputetin Fatmir Xhafaj u përfshi nga flakët me një shpejtësi tronditëse. Zjarri, që sipas raportimeve nisi nga disa kartona të djegur nga fëmijë pranë një supermarketi në katin përdhes, u kthye brenda minutash në një ferr të vërtetë për banorët.
Ajo që e bën këtë ngjarje alarmante nuk është vetëm shkaku i zjarrit, por mënyra sesi ndërtesa u dorëzua përpara flakëve. Një pallat shumëkatësh, që në kushte normale duhet të përballojë situata të tilla, u dogj si letër, duke ngritur dyshime të forta për cilësinë e materialeve dhe standardet e ndërtimit.
Banorët humbën gjithçka brenda pak minutash, ndërsa përgjegjësit vazhdojnë të mos japin llogari. Kompania ndërtuese nuk ka ndalur aktivitetin, ndërsa askush nuk është vënë realisht përpara përgjegjësisë për një ngjarje që mund të kishte marrë përmasa edhe më tragjike.
Në këtë sfond, refuzimi i lejes për “Arlis sh.p.k” nuk është thjesht një procedurë administrative – është një reagim i vonuar ndaj një realiteti të hidhur që qytetarët e përjetojnë çdo ditë: ndërtimet që bëhen shpejt, lirë dhe pa standarde, ku siguria mbetet në plan të dytë.
Megjithatë, ky vendim ngre një tjetër pyetje thelbësore: a do të mjaftohet shteti me refuzimin e një lejeje, apo do të shkojë deri në fund për të zbardhur përgjegjësitë dhe për të ndëshkuar ata që ndërtojnë pa garantuar jetën e qytetarëve?
Discussion about this post