Pas ekstradimit nga Belgjika, Gjykata e Posaçme ka lënë në fuqi masën e “arrestit në burg” për Leonard Dukën, i akuzuar për vrasjen e Santiago Malkos.
Duka nuk ka pranuar që të japë asnjë shpjegim përballë togave të zeza.
Ai ra në pranga një vit më parë, në shkurt 2023, teksa fshihej në një banesë private në një provincë të Brukselit.
Duka ishte shpallur në kërkim ndërkombëtar nga Interpol Tirana, pasi Gjykata e Posaçme Kundër Korrupsionit dhe Krimit të Organizuar i ka caktuar masën e sigurisë “Arrest në burg”, për veprat penale “Vrasja me dashje”, kryer në formën e veçantë të bashkëpunimit, “Mbajtja pa leje dhe prodhimi i armëve, armëve shpërthyese dhe municionit”, “Sigurimi i kushteve për vrasje”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Së bashku me gjashtë persona të tjerë, ata akuzohen si autorët e dyshuar të ngjarjes së ndodhur në vitin 2019, në rrugën “Xhanfize Keko”, Tiranë, ku mbeti i vrarë me armë zjarri, ish polici Santiago Malko, krahu i djathtë i “bosit” të lojërave të fatit, Ervis Martinaj.
Gjithashtu, Duka në bashkëpunim me persona të tjerë, ka planifikuar disa herë vrasjen e Ervis Martinajt dhe gjithashtu dyshohet si autor i vrasjes së Erigers Mihasit apo anëtarëve të tjerë të grupit të Martinajt.
Leonard Duka njihet si një kundërshtar i betuar i Ervis Martinajt, të cilët megjithëse kishin qenë miq dhe ortakë në biznesin e lojërave të fatit, më pas patën përplasje të ashpra pikërisht.
Siç zbuloi dhe dosja hetimore e “7 bandave”, konflikti ndërmjet Leonard Dukës dhe Ervis Martinajt ka nisur për shkak të një debati që Leonard Duka kishte me shtetasin e vrarë me datë 27.08.2019 Santiago Malko, i cili referuar hetimeve ka dhunuar babain e Leonardit.
Pas vrasjes së Santiago Malkos, Ervis Martinaj bën përgjegjës për këtë vrasje Leonard Dukën dhe lidhjet e tij, ku sipas hetimeve, del në pah angazhimi i tij për të vrarë shtetasit Leonard Duka dhe lidhjet e tij.
Të njëjtën gjë bën dhe Leonard Duka.
Discussion about this post