Në veri të Mitrovicës është dëgjuar alarmi, përmes së cilës grupet ilegale atje kërkojnë grumbullimin e qytetarëve serbë.
Policia e Kosovës ka bërë arrestimin e një personi të strukturave kriminale në sheshin “Car Llazar” dhe pas kësaj disa persona kanë sulmuar veturën e policisë.
Mediat në Kosovë raportojnë se personi i arrestuar është Milun Milenkoviq, i njohur si Llune.
Disa ditë më parë kryeministri i vendit, Albin Kurti theksoi se rolin kryesor në organizmin e protestave të dhunshme e kanë pasur anëtarët e formacionit ilegal të ashtuquajtur ‘Mbrojtja Civile’ dhe ish-pjesëtarë të Policisë së Kosovës ku është parë prezencë e madhe e tyre në terren.
Në lidhje me këtë ngjarje ka reaguar edhe ministri i Brendshëm i Kosovës, Xhelal Sveçla:
“Arrestohet një nga organizatorët e sulmeve ndaj pjesëtarëve të KFOR-it.
Policia e Kosovës sot ka arrestuar Milun Milenkovic- Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës. I njejti ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan.
Gjatë arrestimit të tij, janë sulmuar zyrtarët e Policisë së Kosovës me ç’rast tre nga ta janë të lënduar lehtë.
Siç edhe e kam theksuar në vazhdimësi, koha e bandave kriminale në veriun e vendit tonë ka përfunduar. Të gjithë individët apo grupet kriminale që kanë cënuar sigurinë dhe rendin kushtetues të Republikës së Kosovës, do të përballen me drejtësinë.
Republika nuk do të zmbrapset.”
Discussion about this post