Dalin emrat e anëtarëve të Grupit Koordinues të protestës që po zhvillohet në Tiranë. Përmes një letre drejtuar sot ambasadorëve dhe shefave të misioneve diplomatike të vendeve perëndimore të akredituara në Shqipëri, grupi ka paraqitur pesë kërkesa kryesore drejtuar qeverisë.
Në dokument kërkohet, si pikë e parë, dorëheqja e kryeministrit dhe e qeverisë aktuale, duke e cilësuar atë si një hap të domosdoshëm dhe të panegociueshëm për rinovimin demokratik të vendit.
Kërkesa e dytë parashikon krijimin e një qeverie tranzitore teknokrate dhe jopartiake, me mandat 12-mujor, e cila do të mbikëqyrte një proces reformash të besueshëm dhe të paanshëm.
Grupi kërkon gjithashtu një reformë kushtetuese gjithëpërfshirëse, të mbështetur në parimin e barazisë së të gjithë qytetarëve para ligjit dhe që të miratohet përmes referendumit popullor. Sipas tyre, kjo reformë duhet të përfshijë ndryshimin e Kodit Zgjedhor, reformimin e legjislacionit për financimin e partive politike dhe organizatave të shoqërisë civile, si edhe vendosjen e kufizimit të mandateve për postin e kryeministrit në maksimumi dy mandate, të plota ose të pjesshme.
Në letrën drejtuar diplomatëve kërkohen edhe korrigjime të menjëhershme ligjore, përmes shfuqizimit të ndryshimeve në Ligjin për Zonat e Mbrojtura, Ligjin për Trashëgiminë Kulturore, paketës ligjore të njohur si “Paketa e Maleve”, si dhe kuadrit ligjor për Investimet Strategjike.
Së fundi, Grupi Koordinues propozon hartimin e një kontrate të re sociale mes qytetarëve dhe shtetit, e cila, sipas tyre, duhet të ndërtohet përmes konsultimeve të gjera me intelektualë të pavarur, ekspertë teknikë dhe përfaqësues jopartiakë të shoqërisë civile, në përputhje me propozimet e lëvizjes qytetare.
Ky është hapi i parë zyrtar i Grupit Koordinues të 27 protestave të zhvilluara deri më sot në Tiranë. Pesë kërkesat u deklaruan publikisht për herë të parë nga Dritan Goxhaj. Banorja e Rrjollit dhe një prej organizatoreve të protestave, Luçjana Kokaj, tha se Goxhaj nuk është pjesë e Grupit Koordinues, por u zgjodh nga ky i fundit vetëm për të artikuluar publikisht kërkesat.
Nënshkruesit e letrës në emër të Grupit Koordinues janë:
Entela Koja
Arben Kola
Megan Balaj
Edviol Kulluri
Luçjana Kokaj
Gentjan Progni
Gjon Ndoj
Etleva Merko
Everest Bardhi
Përparim Gjeka
Mevlan Mata
Ilir Xhemalaj
Marjen Rama
LETRA E PLOTË:
Shkëlqesive Tuaja,
Ambasadorëve dhe Shefave të Misioneve të vendeve perëndimore të akredituar në Republikën e Shqipërisë
Lënda: Njoftim mbi kërkesat e protestuesve
Shkëlqesi,
Në emër të Grupit Koordinues të Protestës, që përfaqëson një lëvizje të gjerë dhe paqësore qytetare, e cila ka mobilizuar qytetarët shqiptarë për njëzet e shtatë ditë radhazi, kemi nderin t’ju drejtohemi me frymë transparence, përgjegjësie demokratike dhe respekti për vlerat që bashkojnë vendin tonë me komunitetin euroatlantik.
Shqipëria ndodhet në një moment përcaktues të zhvillimit të saj demokratik. Qytetarët e mbledhur në mënyrë paqësore në sheshet publike në mbarë vendin po ushtrojnë të drejtën e tyre themelore për shprehje qytetare, të udhëhequr nga një angazhim i thellë për shtetin e së drejtës, qeverisjen demokratike dhe dinjitetin njerëzor.
Në këtë kontekst, Grupi Koordinues i Protestës paraqet me respekt kërkesat e mëposhtme, të cilat pasqyrojnë vullnetin e popullit sovran:
- Dorëheqjen e Kryeministrit dhe të Qeverisë aktuale, si një hap thelbësor dhe i panegociueshëm drejt ripërtëritjes demokratike.
- Krijimin e një qeverie kalimtare teknike, jopartiake, me mandat dymbëdhjetëmujor për të mbikëqyrur një proces reformash të besueshëm dhe të paanshëm.
- Reformë tërësore kushtetuese, të mbështetur në parimin e barazisë së plotë të të gjithë qytetarëve shqiptarë para ligjit dhe që të miratohet përmes referendumit popullor.
Kjo reformë duhet të përfshijë, ndër të tjera:
Reformimin e Kodit Zgjedhor.
Reformimin e legjislacionit që rregullon financimin e partive politike dhe organizatave të shoqërisë civile.
Vendosjen e kufizimit të mandateve për postin e Kryeministrit, duke kufizuar çdo individ në jo më shumë se dy mandate, të plota ose të pjesshme, gjatë karrierës së tij politike.
- Korrigjime të menjëhershme ligjore, duke përfshirë:
Shfuqizimin e ndryshimeve në Ligjin për Zonat e Mbrojtura (Ligji nr. 21/2024).
Shfuqizimin e ndryshimeve në Ligjin për Trashëgiminë Kulturore.
Shfuqizimin e paketës ligjore të njohur si “Paketa e Maleve”.
Shfuqizimin e kuadrit ligjor që rregullon Investimet Strategjike.
- Hartimin e një kontrate të re shoqërore ndërmjet qytetarëve dhe shtetit, që do të zhvillohet përmes konsultimeve të gjera me intelektualë të pavarur, ekspertë teknikë dhe përfaqësues jopartiakë të shoqërisë civile, në përputhje me propozimet e lëvizjes qytetare.
Këto kërkesa përfaqësojnë shprehjen e qartë dhe legjitime të një populli sovran, të përkushtuar ndaj vlerave demokratike dhe shtetit të së drejtës. Me respekt ju bëjmë thirrje që të merrni në konsideratë seriozitetin dhe sinqeritetin e kësaj lëvizjeje qytetare dhe të mbështesni një zgjidhje paqësore, demokratike dhe gjithëpërfshirëse të krizës aktuale politike në Shqipëri.
Mbetemi në dispozicionin tuaj për çdo komunikim të mëtejshëm dhe besojmë në angazhimin tuaj të vazhdueshëm për demokracinë dhe dinjitetin njerëzor në Shqipëri, si pjesë e vlerave tona të përbashkëta evropiane.
Ju lutemi pranoni shprehjen e konsideratës sonë më të lartë.
gijotina.com/
Discussion about this post