Anëtari i Lëvizjes “Bashkë”, Kristjan Zoto i drejtohet me një pyetje drejtuesit të “Shqipëria Bëhet”, Adriatik Lapajt, nëse ka pasur rolin e ndërmjetësit për marrëveshjen e ndërtimit të një kompleksi turistik në Gjirin e Krorëzës. Në një postim në Facebook, Zoto ka publikuar edhe një foto të marrëveshjes, ku shihet se një nga personat që ka firmosur është edhe Lapaj.
Ai shprehet se kompania ndërtuese e këtij kompleksi është e lidhur me Dajlan Avdian, i cili sipas tij, ka përfituar qindra milionë euro nga statusi i “investitorit strategjik” për projekte luksoze në bregdetin e jugut. Po ashtu, shton se ky person është pas ndërtimit të tre kullave në Tiranë, “përfshirë kullën pranë Sahatit, si dhe dy të tjera në zonën e Bllokut dhe pas Presidencës”. Zoto i kërkon Lapajt të sqarojë publikisht rolin e tij në këtë marrëveshje.
Në postimin në Facebook, Zoto shkruan:
“Adriatik Lapaj, a është i vërtetë ky dokument ku figuron firma juaj si ndërmjetësues për marrëveshjen e ndërtimit të një kompleksi turistik në Gjirin e Krorëzës? TDT & PARTNERS është një kompani e përfshirë në projekte të mëdha ndërtimi në disa nga zonat më të bukura dhe të paprekura të bregdetit shqiptar, përfshirë Gjirin e Krorezës dhe Kalanë e Lëkursit. Kjo kompani lidhet drejtpërdrejt me Dajlan Avdian (ish-pronarin e “APEX”), një nga ndërtuesit më të fuqishëm në vend, i cili ka përfituar qindra milionë euro nga statusi i “investitorit strategjik” për projekte luksoze në bregdetin e jugut. Përveç kësaj, ai është pas ndërtimit të tre kullave në Tiranë, përfshirë kullën pranë Sahatit, si dhe dy të tjera në zonën e Bllokut dhe pas Presidencës. A mund të sqaroni publikisht rolin tuaj në këtë marrëveshje”.
Discussion about this post