Kancelarja gjermane Angela Merkel pritet të vizitojë Shqipërinë dhe Serbinë këtë shtator, duke ngjallur kureshtje se për çfarë do të diskutojë kancelarja gjermane me liderët e Ballkanit.
Media serbe “Blic”, i ka dedikuar një artikull bisedës që Merkel mund të zhvillojë me presidentin Aleksandër Vuçiç, ku mbizotëron çështja e Kosovës.
“Përpara se ajo të largohet zyrtarisht nga pozita e kancelares gjermane, Angela Merkel do të vizitojë Serbinë, dhe pyetja e parë që lind është se sa mesazhe të fshehura dhe të hapura do të përçojë? Dialogu midis Beogradit dhe Prishtinës, situata në Bosnjë Herzegovinë, “Ballkani i hapur”, por edhe investimet ekonomike mund të jenë temat kryesore të vizitës, vlerësojnë analistët për “Blic”,”-shkruhet në artikull.
Merkel do të kalojë dhe njëherë të fundit në Ballkan, para se të largohet nga jeta politike. Ajo pritet të mbërrijë në Tiranë më 14 shtator, ku edhe pritet të takojë liderët e tjerë të Ballkanit Perëndimor, por as Vuçiç dhe as shefja e kabinetit Ana Brnabiç nuk janë të ftuar. Takimi i fundit i Merkel do të jetë me kryeministrin e Kosovës, Albin Kurti, ndërkohë që priten edhe konferenca për mediat.
