Drejtoria e Përgjithshme e Burgjeve ka ndërmarrë lëvizje të reja në drejtimin e institucioneve penitenciare, si dhe ka intensifikuar kontrollet brenda tyre, në një përpjekje për të forcuar sigurinë dhe disiplinën. Këto masa vijnë pas raportimeve të fundit mediatike për takime të dyshimta të personazheve të showbizit me eksponentë të krimit brenda ambienteve të burgjeve.
Në kuadër të riorganizimit të strukturave drejtuese, janë bërë dy emërime:
- Altin Ago është emëruar në krye të Burgut të Peqinit.
- Qazim Hoxha është caktuar drejtor i Institucionit të Ekzekutimit të Vendimeve Penale (IEVP) Elbasan.
Njëkohësisht me emërimet, burime zyrtare bëjnë me dije se janë zhvilluar kontrolle blic në disa burgje të vendit. Këto kontrolle kanë si qëllim identifikimin dhe sekuestrimin e sendeve të palejuara brenda qelive, si telefona, lëndë narkotike apo objekte të tjera të ndaluara.
Po ashtu, një fokus i veçantë po i kushtohet verifikimit të kartelave të takimeve të të dënuarve dhe paraburgosurve. Ky proces ka për qëllim garantimin e respektimit të rregullave dhe parandalimin e çdo shkeljeje që mund të komprometojë sigurinë ose integritetin e sistemit penitenciar. Ky veprim vjen si përgjigje e drejtpërdrejtë ndaj raportimeve mediatike që sugjeronin se vajza të showbizit kishin zhvilluar takime “speciale” me figura të njohura të botës së krimit brenda burgjeve.
Discussion about this post