Klaudio Malaj është shoferi i ish kreut të Inspektoratit Ndërtimor Urbanistik të Bashkisë së Tiranës, Mariglen Qato, i cili u arrestua disa ditë më parë pasi iu gjetën sasi kokaine, gati për shpërndarje, si edhe tre pistoleta.
Në njoftim për media, Policia e Tiranës përmendi vetëm faktin se është arrestuar shtetasi K.M., pa dhënë detaje se kush ishte identiteti i personit në fjalë. Në pamjet e shpërndara së bashku me njoftimin, dallohet edhe një dokument me logon e Bashkisë së Tiranës.
Të hënën e kësaj jave, Drejtoria e Policisë së Tiranës njoftoi se kishte finalizuar operacionin të emërtuar “Doses” (Dozat), ku gjatë operacionit u arrestua 31-vjeçari K.M (Klajdi Malaj).
Në momentin që efektivët e “Shqiponja-s” kanë ndaluar mjetin luksoz Audi A6, në pronësi të shoferit të Mariglen Qatos, ai ka deklaruar se është punonjës i Bashkisë së Tiranë, duke tentuar shmangien e kontrollit.
Por, duket se tentativat e tij kanë dështuar, pasi pas një kontrollit të policisë, janë gjetur 35 doza me lëndë të dyshuar narkotike kokainë, gati për shitje si dhe 3 armë zjarri pistoleta dhe municion luftarak.
Është ende e paqartë se si kishte arritur Malaj që, duke qenë me detyrë shofer, të blinte një makinë tepër të shtrenjtë. Po ashtu, nuk dihet nëse për veprimtarinë e tij kriminale ka qenë apo jo në dijeni shefi i tij, Mariglen Qato, i cili udhëtonte gjatë ushtrimit të funksioneve zyrtare me një shpërndarës kokaine në sasi të mëdha, sipas përcaktimit që ka bërë Policia.
Discussion about this post