Robert Lewandowski është edhe më shumë golashënuesi më i mirë i La Liga-s pas javës së 12-të. Polaku shënoi golin e tij të 13-të (më shumë se një gol për ndeshje, për momentin) në La Liga për t’i dhënë Barcelonës fitoren në “Mestalla” në minutën e 93-të të lojës. Borja Iglesias, i cili shënoi kundër Real Sociedad, është i vetëm në vendin e dytë me 8 gola.
Partneri i polakut, Ter Stegen, gjithashtu përforcon udhëheqjen e tij për trofeun “Zamora” (portiere me më pak gola të pësuar në La Liga). Gjermani ka pësuar 4 gola në 12 ndeshje. Në dhjetë prej tyre e ka mbajtur portën të pastër. Vetëm Real Sociedad dhe Real Madridi e kanë mposhtur portierin e Barcelonës.
Robert Lewandowski dominon trofeun “Pichichi” falë 13 golave që ka shënuar në 12 ndeshjet e para. Kundër Valencias, polaku shënoi sërish dhe i dha skuadrës së tij tri pikët e arta. Ai po nënshkruan një sezon të parë ëndrrash në La Liga. Lojtari që shënoi më shumë gola në debutimin e tij në Spanjë ishte Ronaldo Nazario, i cili në La Liga-n 1996-1997 arriti të shpallej golashënuesi më i mirë me 34 gola.
Në 12 ndeshjet e para të atij kampionati, ylli brazilian shënoi 12 gola, një më pak se ka realizuar tani polaku. Sigurisht, Lewandowski është larg rekordit të golave të shënuar në 12 ndeshjet e para të historisë së La Liga-s. Një nder të tillë e ka Cristiano Ronaldo, i cili shënoi 20 gola për Real Madridin në sezonin 2014-2015, në këtë segment kohor të kampionatit spanjoll. Përveç kësaj, Lewandowski ka shënuar në 9 nga 12 ndeshjet, ashtu si edhe Costa (2013-2014) dhe Cristiano (2014-2015).
Discussion about this post