Një aksident i rëndë rrugor është regjistruar rreth orës 16:30 në lagjen “Gurra” të qytetit të Lezhës, ku një automjet ka përplasur dy kalimtare dhe është larguar nga vendi i ngjarjes.
Sipas njoftimit zyrtar, shtetasi A. J., 27 vjeç, duke drejtuar automjetin e tij, ka aksidentuar shtetaset P. D., 59 vjeçe, dhe Xh. D., 20 vjeçe, të cilat ishin duke lëvizur në këmbë. Pas përplasjes, ai është larguar nga vendi i ngjarjes, duke mos u ndalur për të ofruar ndihmë.
Të plagosurat janë dërguar me urgjencë në spitalin e Lezhës, ku mësohet se shtetasja P. D. ndodhet në gjendje të rëndë shëndetësore.
Pas hetimeve të menjëhershme nga ana e Policisë, A. J. është identifikuar dhe ndaluar së bashku me automjetin, disa orë pas ngjarjes.
Testi i alkoolit ka konfirmuar se ai ndodhej në gjendje të dehur në momentin e aksidentit.
Discussion about this post