Policia e Lezhës informon se ka identifikuar dhe shpallur në kërkim tre shtetas, të dyshuar si personat që mbrëmjen e 13 nëntorit 2021 hynë të maskuar dhe të armatosur në një lokal dhe terrorizuan disa të rinj. Burime bëjnë me dije se në kërkim për këtë ngjarje është shpallur edhe Ramazan Rraja, nipi i deputetit të PS-së, Rrahaman Rrajës. Mësohet se 2 personat e tjerë të shpallur në kërkim janë A. D., 31 vjeç, banues në Fushë Krujë dhe R. B., 29 vjeç, banues në Pllanë, Lezhë. Këta persona janë të njohur për drejtësinë, pasi rezultojnë me precedentë të mëparshëm kriminal në fushën e krimeve ndaj personit, armëmbajtjes pa leje dhe narkotikëve, të cilët menjëherë pas ngjarjes janë larguar jashtë vendit.
Mësohet se ngjarja e ndodhur në 13 nëntor të këtij viti ka ardhur si pasojë e një konflikti të ndodhur më parë ndërmjet kushëririt të pronarit të lokalit dhe një shtetasi që është mik i tre personave që u shfaqën të armatosur. Këta të fundit kanë shkuar të armatosur, në lokalin në pronësi të shtetasit A. K., dhe kanë kërkuar kushëririn e tij, shtetasin L. M.(K), (i cili më herët ishte konfliktuar me shtetasin Gj. J., mik i tre autorëve të dyshuar), por shtetasi L. M.(K), në momentet e ngjarjes nuk ka qenë në ambientet e lokalit. Pasi u futën të armatosur në ambientet e lokalit, ku ndodheshin disa të rinj, autorët e dyshuar kërkuan kartat e identitetit dhe pasi kuptuan se personi që kërkonin nuk ishte prezent u larguan. Mbi ta rëndon akuza për veprat penale “Vrasja” e mbetur në tentativë, “Armëmbajtja pa leje” dhe “Kanosja”, e mbetur në tentativë, të kryera në bashkëpunim.
Pas publikimit të videos në media dhe rrjetet sociale, nga shërbimet e Policisë është bërë i mundur identifikimi i të gjithë shtetasve që ndodheshin në lokal, të cilët në vijim të veprimeve hetimore janë proceduar penalisht për veprën penale “Moskallëzim krimi”.
Materialet hetimore u referuan në Prokurorinë e Rrethit Gjyqësor Lezhë, për veprime të mëtejshme.
Discussion about this post