Një banesë është grabitur mbrëmjen e djeshme në fshatin Spiten në qytetin e Lezhës. Kanë qenë dy persona të cilët kanë hyrë në banesën e Gj.D. dhe dhunuan atë dhe bashkëshorten e tij 47-vjeçare V.D. Sipas policisë autorët mundën të merrnin një sasi parash dhe 2 celularë.
“Më datë 24.05.2021, pas mesnatës, në fshatin Spiten, Lezhë, jemi njoftuar nga shtetasi Gj.D., se dy persona të paidentifikuar kanë vjedhur në banesën e tij duke i dhunuar atë dhe bashkëshorten shtetasen V.D.,47 vjeçe, një sasi lekësh dhe 2 aparate celularë”, njoftoi policia.
Më pas u larguan në drejtim të paditur. Çifti i bashkëshortëve ka njoftuar menjëherë më pas policinë për ngjarjen e ndodhur. Grupi hetimor ka shkuar në vendngjarje dhe ka fiksuar disa prova materiale të lëna në banesë nga grabitësit.
Këto prova do të analizohen dhe do të shërbejnë për zbardhjen e ngjarjes dhe identifikimin e arrestmin e autorëve. Gjithashtu, janë shoqëruar në komisariat disa persona që dyshohet të kenë dijeni për ngjarjen
Deklarata e bashkëshortit:
“30 minuta pasi jemi ulur të flemë, dëgjuam zhurma në banesë dhe mendova se ishin vajzat. Sa u ula në katin e parë të banesës u përballa me dy persona të maskuar dhe të armatosur. Një prej tyre më ka goditur disa herë”.
Kjo është dëshmia e kryefamiljarit Gjergj Doçi, i cili mbrëmjen e kaluar është dhunuar nga dy persona që kanë hyrë për të grabitur në banesën e tij në fshatin Spiten.
Gruaja e tij 47-vjeçare është në gjendje më të rëndë dhe është dërguar me ambulancë në Spitalin e Traumës në Tiranë.
61-vjeçari tha se pas tij në katin e parë të banesës ka zbritur dhe bashkëshortja, e cila është qëlluar po kështu nga grabitësit dhe ka marrë dëmtime më të mëdha.
“Unë humba ndjenjat, rashë përtokë nga goditjet. Kur u përmenda më goditën përsëri. Pak minuta pas meje ka zbritur dhe bashkëshortja, e cila është qëlluar në kokë dhe brinjë. Është dëmtuar më rëndë. Autorët morën telefona e çfarë gjetën. Më pas kam lajmëruar policinë dhe kemi ardhur në spital”, tregoi Gjergj Doçi për gazetarin e “BalkanWeb” Elidon Ndreka.
61-vjeçari ka të qepura në kokë dhe dhimbje në brinjë, ku dyshohet se ka thyerje. “Njëri kishte armë, tjetri kishte një hekur dorezë se di, me atë më qëlloi”, tregon kryefamiljari.
Grupi hetimor ka gjetur dy gjurmë gishtërinjsh në shtëpinë dy katëshe dhe sende të tjera që mund të çojnë drejt zbardhjes së ngjarjes. Për grabitjen janë shoqëruar në polici disa të dyshuar.
