Ministri i Brendshëm, Bledi Çuçi ka bërë me dije fokusin e bisedës me homologun e tij, sheikun Saif bin Zayed Al Nahyan, në Emiratet e Bashkuara. Çuçi njoftoi se dy vendet janë gati për të nënshkruar një marrëveshje, me synim goditjen e krimit të organizuar.
“Një bisedë e ngrohtë dhe miqësore me Shkëlqesinë e Tij Sheik Saif bin Zayed Al Nahyan, Ministër i Brendshëm i Emirateve të Bashkuara Arabe, me të cilin diskutuam për çështje të përbashkëta të sigurisë dhe të raporteve mes dy vendeve tona. Ndajmë sfida të përbashkëta, por edhe mundësi për të ardhmen. Jemi gati për nënshkrimin e marrëveshjes dypalëshe, për më shumë mundësi dhe efektivitet në luftën kundër krimit të organizuar, luftën kundër terrorizmit, por edhe për shkëmbim njohurish dhe modernizim të teknologjisë në Policinë e Shtetit”, thotë ministri Çuçi.
Çuçi gjithashtu bëri me dije se shqiptarët mund të udhëtojnë pa viza drejt Emirateve të Bashkuara. Forcimi i bashkëpunimit mes dy vendeve sipas tij do të ketë impakt pozitiv në ekonominë e vendit.
“Bashkëpunimi ynë në këto fusha sjell impakt pozitiv edhe në drejtim të ekonomisë, për nxitjen e investimeve dhe zhvillimin e mëtejshëm të turizmit. Në funksion të këtij sektori me interes të dyanshëm teksa kemi bërë tashmë një hap cilësor me fluturimet e linjave ajrore direkte, u dakordësuam edhe për lëvizjen e lirë pa viza të shqiptarëve drejt Emirateve të Bashkuara Arabe”, shprehet ministri Çuçi.
Discussion about this post