Kur kanë kaluar më pak se pesë muaj nga pezullimi i 13 punonjësve të Policisë së Shkodrës, nën dyshimet se kanë toleruar kultivuesit dhe trafikantët e narkotikëve të Dukagjinit, pjesë më e madhe e tyre janë rikthyer në detyrë.
Të paktën 7 oficerë, përfshirë ish-zv.drejtorin e Policisë së Shkodrës, Hajri Kushe, si edhe disa kolegë të tij, fituan të drejtën nga Gjykata e Apelit për t’u rikthyer në detyrë, pasi atyre iu rrëzua masa ndaluese e “pezullimit nga detyra”.
Ndërkohë, edhe 6 efektivët e tjerë pritet t’u bashkohen kolegëve të tyre në detyrë, pasi ata kanë dorëzuar pak më vonë kërkesën në Gjykatën e Apelit për të hequr masën e sigurimit.
Të 13 zyrtarët e Policisë u morën nën hetim nga Prokuroria e Shkodrës për veprën penale të “shpërdorimit të detyrës”, pasi u siguruan të dhëna se ata kishin toleruar me dashje krijimin e serave me kanabis sattiva në zonën e Anës së Malit, si edhe nuk kishin vepruar për arrestimin e autorëve të dyshuar të kultivimit, megjithëse, sipas hetuesve, i kishin pasur shumë pranë.
Por, ky operacion masiv, i zhvilluar në bashkëpunim me Agjencinë e Mbikëqyrjes Policore (AMP) u shfry brenda pak muajve, kryesisht për aspekte proceduriale.
Në rastet e aplikimit të masës “pezullim nga detyra”, prokuroria është e detyruar që të përfundojë hetimet brenda tre muajve.
Ligji procedurial parashikon që prokuroria të kërkojë edhe zgjatje të mëtejshme me nga 3 muaj, gjithnjë nëse arrin të bindë gjykatës se personat nën hetim mund të prishin provat, të kryejnë vepra të tjera penale apo të cenojnë dëshmitarët.
Në gusht të këtij viti, Prokuroria e Shkodrës arriti të bindë gjykatën e qytetit dhe atë të Apelit për të shtyrë me një afat tre-mujor masën e pezullimit nga detyra, me argumentin e nevojave të hetimit.
Edhe kur kërkoi një afat 3-mujor të dytë zgjatjeje të masës, prokuroria e Shkodrës gjeti mirëkuptimin e gjykatës lokale. Por, Gjykata e Apelit të Juridiksionit të Përgjithshëm në Tiranë nuk gjeti asnjë arsye për zgjatjen e dytë të pezullimit.
Në 24 Tetor 2023, Gjykata e Apelit vendosi të lirojë nga masa e “pezullimit nga detyra” funksionarët e policisë; Nazmi Beqiri, Gjin Guri, Hajri Kushe, Ilir Hasaj, Dedin Gjeta, Vehbi Nase dhe Asllan Shutaj, të cilët kishin bërë kërkesë në shkallën e dytë të gjyqësorit.
Trupa gjykuese e Apelit është kujdesur të sqarojë në vendimin e shpallur ditët e fundit se heqja e masës së pezullimit është kryer vetëm për ata persona që i janë drejtuar gjykatës. Ndërkohë, duket se të njëjtin fat do të ketë edhe 6 të tjerët; Pllumb Shpati, Taulant Kurtaj, Arben Memaj, Arben Dekovi, Sokol Pjetri, Ardin Çopja.
Si nisi hetimi
Duke filluar prej mesit të vitit 2021, Agjencia e Mbikëqyrjes Policore kishte indicje se drejtues dhe efektivë të Policisë së Shkodrës toleronin mbjelljen e parcelave me kanabis në zonën e Mbi-Shkodrës.
Për shkak të çështjeve delikate dhe ruajtjes së sekretit, agjentët e AMP-së e zgjatën për disa kohë verifikimin dhe, rreth pranverës së vitit 2022, mesa duket pas një rrjedhjeje informacioni, Drejtoria e Policisë së Shkodrës ndërhyri në disa parcela të sapo mbjellja me kanabis.
Ndërhyrja e policisë mbi parcelat rrëzoi përkohësisht indiciet e AMP-së për bashkëpunim të mundshëm mes zyrtarëve policorë lokalë dhe kultivuesve të drogës.
Por, në periudhën Maj-Qershor 2023, një seri informacionesh, të mbërritura kryesisht nga institucionet e inteligjencës dhe agjenci partnere ndërkombëtare, rikthyen sërish dyshimin për një bashkëpunim të mundshëm mes policisë dhe trafikantëve të fshatrave mbi Shkodër.
Kësaj radhe, AMP bashkëpunoi që në krye të herës me Prokurorinë e Shkodrës, duke i vendosur në dispozicion materialet dhe duke e kryer hetimin në dinamikë.
Në 26 qershor të këtij viti, Agjencia e Mbikëqyrjes Policore njoftoi rezultatet e hetimit, duke bërë publike faktin se 13 zyrtarë policorë janë pezulluar nga detyra. Mes tyre ishte zv.drejtori i Policisë së Shkodrës, Hajri Kushe, si edhe shefi i Krimeve në Komisariatin e qytetit, Pëllumb Shpati. Ndaj këtij të fundit u vendos edhe masa e “arrestit në shtëpi”.
Detajet e hetimit
Prokuroria e Shkodrës dyshon se të paktën 13 punonjësit e policisë, për të cilët u vendosën nga gjykata masa nga arresti në shtëpi deri në ndalim për daljen jashtë shtetit, kanë shpërdoruar detyrën.
Sipas hetimit, këta zyrtarë policorë jo vetëm që nuk kanë marrë masa për parandalimin e kultivimit të lëndëve narkotike në zonën e Shkodrës, por dyshohet se kanë favorizuar në mënyrë të ripërsëritur kultivuesit e bimëve narkotike, duke lejuar këta të fundit që të krijonin një strukturë të mirëorganizuar për kultivimin e një sasie shumë të madhe kanabis sativa në tre fshatra të njësisë administrative Ana e Malit.
Po ashtu, Prokuroria e Shkodrës dyshon se këta zyrtarë policorë kanë bashkëpunuar me kultivuesit, duke iu siguruar atyre informacione në lidhje me ndërhyrjet që do të ndërmerreshin nga struktura të tjera policore në zonë, me qëllim që trafikantët të merrnin masat për heqjen e bimëve narkotike dhe largimin e punëtorëve të tyre nga vendi i ngjarjes.
Për prokurorët, strukturat policore nuk kanë ndërmarrë asnjë masë për verifikimin dhe kryerjen e hetimeve të plotë në terren për parcelat me kanabis, pavarësisht se kanë pasur informacione të sakta nga institucione të tjera ligjzbatuese mbi ekzistencës e parcelave të mëdha me lëndë narkotike.
Dosja hetimore tregon se policët e dyshuar si bashkëpunëtorë me kultivuesit e kanabisit, kanë pasur fantazi për të shmangur goditjen e elementëve kriminalë.
Institucione ligjzbatuese dhe inteligjente kanë furnizuar Policinë e Shkodrës me informacion dhe koordinata të sakta për vendndodhjen e parcelave të mbjella me kanabis.
Por, personat nën hetim kanë shmangur kontrollin në koordinatat e caktuara, duke u justifikuar me faktin se nuk kapnin valët e internetit dhe për pasojë nuk gjenin koordinatat e sakta. Për Prokurorinë, ky justifikimi i mungesës së internetit, rrëzohet në të paktën një rast konkret.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post