Armando Broja është shndërruar në njeriun e momentit tek ekipi kombëtar. Sulmuesi i talentuar ka shënuar gola në ndeshjet më të rëndësishme dhe i ka dhuruar Shqipërisë 6 pikë në dy ndeshjet ndaj Hungarisë. Hapat e para si futbollit Broja i hodhi në Malësinë e Madhe. Idriz Kurtulaj është një bashkëfshatar i familjes Broja dhe tregon lidhjet që kjo familje ka me futbollin.
“Familjen Broja e njoh sepse jemi rritur bashkë, jemi komshinj, miq. Një familje shumë e mirë në të gjitha drejtimet e jetës, e sidomos nga ana sportive, një familje që luajnë futboll të gjithë. Brojajt janë të gjithë dhe jo vetëm Armando që sot u bë një ndër më të mirët e Shqipërisë. Është i vetmi futbollist shqiptar që i ka dhënë Kombëtares 6 pikë në dy ndeshje radhazi. Ai nuk e harron vendlindjen dhe ka krenari që është malësor dhe e ka thënë vetë jam nga Kopliku dhe unë po shtoj se fshati i tij është Kamica. Është ky fshat që dikur ish-kryetari i kooperativës i ka gjetur fshatarët këtu duke luajtur futboll në mes të borës natën për hënë, se ditën duhej të punonin për të bërë normën. Pra, kanë luajtur futboll në borë derisa sistemi i atëhershëm bëri fushën e futbollit.
Do e mbështesim gjithmonë kudo që të jetë. I gjithë fshati Kamicë, por edhe Malësia e Madhe do të jenë tifozë të përjetshëm të Armando Brojës kudo që të jetë. Për malësorët, Broja do të jetë gjithmonë një hero!”, thekson Idrizi.
Një tjetër bashkëfshatar i familjes Broja, Ahmet Musiqaj tregon:
“Ai rrjedh nga një familje me taban e traditë dhe nga një babë që është jo thjesht për vete, por edhe për shoqërinë. Babai i Armandos ka investuar për varrezat e katundit këtu, sepse kanë qenë shumë keq dhe ka blerë rrjetë, i ka rrethuar dhe i ka bërë model. As i biri nuk ka ku shkon, vetëm merr edukatën e babait dhe na nderon atje, por edhe ne këtu. Unë e njoh edhe Armandon, sepse ka ardhur dhe kemi biseduar shpesh me të. Armando është djalë i shkathtë dhe besoj është në zanatin e vet. Nuk ka nevojë për ftesë as për lutje, këtu është vendi i tij dhe ai këtë e di vetë, sepse ka ardhur shpesh dhe të njëjtën gjë do të bëjë edhe tani. Ai kurrë nuk ikën pa u përshëndetur me të gjithë në fshat”, thekson bashkëfshatari i familjes Broja.
