Lidhjet politike/ A ka gisht Fatmir Xhafaj në punësimin e Muçi Shaljat në AMP?

Detajet e lidhjeve politike dhe institucionale të viktimave të atentatit të Rinasit po thellohen, ndërkohë që bilanci i këtij krimi të rëndë është rënduar. Muçi Shaljani (Sheqeri), i cili u plagos rëndë në sulmin e mesditës së 11 Nëntorit pranë Aeroportit, ka ndërruar jetë në Spitalin e Traumës. Shaljani, i cili mori dhjetë plumba në trup, vdiq rreth orës 03:00 të mëngjesit, katër ditë pas sulmit.

Shaljani ishte në shoqëri të Gilmando Danit, i cili mbeti i vdekur në vend nga breshëria e plumbave të kallashnikovit. Dani, i njohur si krahu i djathtë i Emiljano Shullazit, dhe Shaljani sapo ishin kthyer nga Barcelona.

Ata u qëlluan me breshëri sapo dolën nga rrethrotullimi i Rinasit. Tre persona me armë dolën nga një makinë tip “Toyota” dhe qëlluan me plumba makinën “Mercedez Benz” të drejtuar nga Shaljani.

Autorët u larguan vetëm pasi u siguruan se Gilmando Dani ishte vrarë dhe më pas dogjën makinën bashkë me armët në fshatin Halil. Automjeti dhe targat rezultuan të vjedhura në Greqi.

Automjeti i përdorur në krim dyshohet se ka dalë nga banesa e Ylli Zallës, i cili u shpall në kërkim pasi iu gjet një arsenal armësh. Dyshohet se Zalla ka siguruar armët për grupin e atentatorëve.

Gilmando Dani, krahu i djathtë i Shullazit, kishte një histori të gjatë kriminale dhe i kishte shpëtuar dy atentateve më parë. Ai ishte liruar nga burgu në Tetor 2024 pas një vendimi gjykate për liri me kusht.

Lidhjet institucionale dhe politike

Ngjarja merr përmasa të tjera për shkak të lidhjeve institucionale të Shaljanit dhe dyshimeve për lidhje politike.

Muçi Shaljani ishte bërë pjesë e Agjencisë së Mbikëqyrjes Policore (AMP) si agjent me një kontratë provizore pune tremujore në Shtator, në shkelje të ligjit. Ai rezultoi se nuk kishte certifikatë sigurie dhe as nuk kishte aplikuar për të.

Ndërkohë, Eduart Merkaj, i cili është drejtori aktual i AMP-së, është djali i shoferit të ish-ministrit të Brendshëm Fatmir Xhafaj. Kjo implikon lidhje të dyshimta në punësimin e Shaljanit në një post kaq të ndjeshëm, pavarësisht mungesës së kritereve.