Komisioni i Ligjeve ka miratuar të martën (11 shkurt) ndryshimet në Kodin Zgjedhor, ndërsa është rrëzuar kërkesa e Partisë Demokratike që shqiptarët të cilët jetojnë jashtë vendit të munden të votojnë edhe me mjete identifikimi të huaja.
Sipas ndryshimeve të miratuara, shpenzimet për dërgimin dhe kthimin e fletës së votimit tek votuesit do të paguhen nga buxheti i shtetit.
Po ashtu është rënë dakord që numërimi dhe vlerësimi i votave nga jashtë territorit të Republikës së Shqipërisë të kryhet në KQZ nëpërmjet një komisioni me anëtarë të propozuar nga Partia Socialiste dhe Partia Demokratike.
Me votat vetëm të maxhorancës kaloi dhe propozimi për afrimin e afateve për listën e kandidatëve për deputet.
“Sistemi i KQZ-së nuk përputh dot fotografinë në moshë minore të personit në dokumentin e skaduar me fotografinë aktuale, por nëse do të përdorte tani pasaportën biometrike italiane do të regjistrohej në moment. Ja pra, provë tjetër, pse sistemi ligjor që po ngrini në kundërshtim me Kushtetutën dhe dispozitën e Kodit Zgjedhor, do të cenojë, ndalojë e diskriminojë me qindra mijëra zgjedhës,” u shpreh deputeti demokrat Oerd Bylykbashi.
“Ligji Zgjedhor e ka përcaktuar qarte: ‘shtetasi shtetas që disponon dokument të vlefshëm’. Në qoftë se doni të ndryshoni ligjin, unë nuk jam dakord ta ndryshoj. Ndryshojeni vetë kur të vini në pushtet po i bëtë 84 vota,” u përgjigj kolegu socialist Damian Gjiknuri.
Afatet e regjistrimit të partive ndryshuan nga 70 ditë në 75 ditë, për koalicionet afati shkoi në 70 ditë nga 60 që ishte, ndërsa për kandidatët për deputetë, afati është 60 ditë.
Ndryshimet në Kodin Zgjedhor pritet të kalojnë të enjten në seancën plenare.
Discussion about this post