Kreu i grupit parlamentar të PS, Taulant Balla ka dhënë një deklaratë për mediat ku ka folur lidhur me projektligjet që do të propozohen në Kuvend mes tyre edhe ligji për dekomunistizimin.
Ai tha se ishte në dakordësi të plotë për projektligjin e lustracionit, propozuar nga PD. Gjithashtu ai foli edhe për projektligjet e dekriminalizimit dhe të partive politike, duke thënë se nuk mund të lejohej që në Shqipëri të kishte kryetarë partish të cilët kishin qenë ish bashkëpunëtorë të sigurimit të shtetit.
“Ne kemi shprehur dakordësinë tonë me propozimin e PD për deklasifikimin e dosjeve. Pra ndryshimi që vjen në ligjin për informacion të klasifikuar për këtë pjesë të paketës së despiunizimit. Në të njëjtin moment kanë ardhur edhe ndryshime të tjera nga drejtoria përkatëse. Duhet përmbyllur aspekti procedural në punën e komisioni ligjor. Dakordësia jonë është dhe besoj që edhe për sa i përket ndryshimit që ne kemi propozuar, që zhbën pengesën që kishte deri tani, vlerësimi nga ana e autoritetit të kujtdo që hyn në juridiksionin e ligjit për t’u vlerësuar, edhe pse është vlerësuar nga komisionet më parë, duhet vlerësuar nën dritën e fakteve të reja që kanë dalë. Sa i takon dekriminalizimit, do shihet nëse kërkohet ndërhyrja në kushtetutë dhe e dyta në ligjin e partive politike, sikurse e kemi thënë që në Shqipëri nuk mund të jesh kryetar i një partie politike, me damkën e ish bashkëpunëtorit të sigurimit të shtetit”, tha Balla.
Discussion about this post