Gjykata Kushtetuese ka marrë në shqyrtim ligjin për studentët e Mjekësisë së Përgjithshme.
Gjatë seancës palët kanë shprehur qëndrimet e tyre në lidhje me ligjin që i detyron mjekët e ardhshëm ose të nënshkruajnë marrëveshjen për të punuar deri 5 vjet pas studimeve në atdhe, ose të paguajnë tarifën e plotë të studimit në vlerën e 248 mijë lekëve të rinj.
Studentët, pala paditëse në këtë çështja, e cilësuan ligjin antikushtetues dhe diskriminues duke kërkuar rrëzimin e tij.
Studentët kërkojnë shfuqizimin e nenit 4 që përcakton bllokimin e diplomës deri në plotësimin e viteve të punës që përcakton ministria e Shëndetësisë, si dhe anulimin e nenit 5 ku përcaktohet se ata studentë që nuk do pranojnë të punojnë deri në 5 vite punë ku ka nevojë shteti, do të duhet të paguajnë tarifën reale të kostove të studimit, e cila është përllogaritur të jetë 248,975 Lekë në vit.
Ndërsa përfaqësuesit ligjorë të Qeverisë dhe Kuvendit kërkuan rrëzimin e kërkesës së studentëve, duke argumentuar se ligji synon mbrojtjen e interesit publik për ofrimin e shërbimit cilësor shëndetësor dhe se nuk shkelen normat kushtetuese për studentët pas 5 orësh seancë, trupi gjykues është tërhequr për marrjen e vendimit të cilin do ta bëjë publik brenda 30 ditësh sipas afateve ligjore.
Në mesin e muajit nëntor, Gjykata Kushtetuese pezulloi ligjin “Për trajtimin e veçantë të studentëve që ndjekin programin e integruar të studimit të ciklit të dytë “Mjekësi e Përgjithshme”. në atë kohë, Gjykata ka pranuar kërkesën e një grupi deputetësh duke pezulluar zbatimin e ligjit deri në shqyrtimin në themel.
Sipas ligjit te miratuar ne Kuvend, studentët e vitit të parë, përpara regjistrimit në universitet do të nënshkruajnë një marrëveshje për tu angazhuar që do të qëndrojnë 5 vite për punësim pas diplomimit, në institucionet shëndetësore dhe diplomën do ta tërheqë pas përmbushjes së këtij detyrimi.
Ndërkohë që për studentët që janë aktualisht në sistem, nga viti i dytë deri në vitin e gjashtë, përsëri në fillim të këtij viti akademik do t’iu duhet të nënshkruajnë një marrëveshje ku angazhohen që do të qëndrojnë përkatësisht: studentët nga viti i dytë deri në vitin e katërt, tre vite, ndërsa studentët e vitit të pestë dhe të gjashtë, dy vite, punësim në Shqipëri.
Qeveria këmbëngul se çdo student i mjekësisë që nuk përmbush detyrimin ligjor, për të ofruar shërbim shëndetësor nga 3 deri në 5 vite në vendin e tij dhe zgjedh të largohet jashtë Shqipërisë pas studimeve, do të duhet të paguajë një tarifë prej 240 mijë lekë të reja për çdo vit studimi.
Discussion about this post