Gjykata e Lezhës ka caktuar ditën e sotme masën e sigurisë “Arrest me burg” për 46-vjeçarin Jetmir Llanaj, i cili akuzohet si pjesë e një grupi prej 5 personash që vendoste gjoba tek bizneset në Kurbin.
Nga hetimet e kryera nga Prokuroria e Lezhës dyshohet se 46-vjeçari dhe 4 të tjerë (konkretisht një i arrestuar dhe 3 të proceduar penalisht, më 19 Shkurt), të organizuar si grup, iu vendosnin gjoba bizneseve, duke ushtruar presion dhe kanosur me armë, me qëllim përfitimin pasuror të padrejtë.
Sipas policisë, Llanaj përdorte 2 të mitur dhe 2 persona të tjerë që i dërgonte tek bizneset duke përcjellë mesazhet e tij të kërcënimeve për përfitim pasuror të padrejte.
Prej 3 muajsh, grupi i Jetmir Llanajt ishte mbajtur nën vezhgim dhe përgjoheshin duke plotësuar të gjitha provat. Dy të miturit u kapën në flagrancë duke tentuar të merrnin një shumë parash tek një biznes dhe pas ndalimit të tyre dhe të një 39-vjeçari në flagrancë u realizua edhe operacioni për kapjen disa ditë më vonë të Jetmir Llanaj. Ky i fundit u arrestua më 3 Mars në Mamurras.
Jetmir Llanaj është një personazh i njohur i botës së krimit. Ai njihet si autori i vrasjes së Gentian Shkretës dhe plagosjes së vëllait të tij, Emanuel Shkreta. Ai e kreu krimin, pasi mori hak për vrasjen e djalit të tij 9-vjeçar, Indrit Llanaj në vitin 2012.
Jetmir Llanaj u dënua me 25 vite burgim nga shkalla e parë, por Apeli e uli, ndërsa mësohet se prej disa muajsh e kishte kryer dënimin dhe ndodhej në liri. Hakmarrja mes fiseve Llanaj dhe Shkreta ka shkatuar disa viktima.
Discussion about this post