Rritja e çmimeve të ushqimeve dhe të naftës, ishte goditja e radhës për shqiptarët pas tërmetit dhe pandemisë. Por edhe pse situata e vështirë ekonomike kërkon hartimin e logjeve dhe politikave për t’i ardhur sa më shumë në ndihmë qytetarëve, si shumica e institucioneve në vend, edhe Kuvendi i bën tenderë për punë që mund të prisnin për një kohë të dytë. Në rastin konkret mësohet se kanë shpenzuar mbi 155 milionë lekë të vjetra me TVSH për disa shërbime mirëmbajtje virtuale.
Bëhet fjalë për tenderin me numër reference REF-27173-04-29-2022, i cili ka si objekt “shërbim mirëmbajtjeje e infrastrukturës virtuale VDI për 24 muaj”. Kjo procedurë ka si fond limit vlerën prej 13,330,000 lekësh të reja pa TVSH ose rreth 160 milionë lekë të vjetra me TVSH.
Siç e kemi thënë edhe më parë, tenderët që kanë të bëjnë me shërbime janë tepër abuzivë pasi nëpërmjet tyre përqindja e abuzimit të mundshëm është akoma më e lartë. Edhe në këtë tender nuk kishte se si të mungonte kjo metodë abuzimi, pasi duke shfletuar dokumentacionin përkatës vihet re se në garë ka marrë pjesë vetëm fituesi. Pra tenderi është dhënë pa garë, që do të thotë se nuk ka pasur fare konkurrencë, por i vetmi operator që ka hyrë në tender është shpallur edhe fitues.
Fitues janë shpallur bashkim i operatorëve “ALBITAL – CANON ” dhe “S&T Albania” me ofertë 12.994.320 lekë të reja pa TVSH ose rreth 155 milionë lekë të vjetra me TVSH. Kjo shifër ndërkohë rezulton të jetë sa 97.48% e fondit limit të tenderit. Të gjitha sa më sipër rrisin dyshimet se kemi të bëjmë me një fitues të paracaktuar.
Discussion about this post