Liria e fjalës e rrezikuar nga media…

Dita e lirisë së shtypit është një ditë e mirë për të parë hijet që kërcënojnë gazetarinë jo nga jashtë, por nga brenda.

Një nga kërcënimet më të mëdha është deformimi i prioriteteve gazetareske. Në vend të përqëndrimit te raportimi objektiv dhe gazetaria hulumtuese në modë sot është opinioni dhe sensacioni. Kjo rokadë ka bërë që miti për gazetarinë këtu të mos jetë te reporteri/gazetari, por opinionisti/analisti. (Një gazetar raporton atë që ka parë /verifikuar dhe atë që ka ndodhur në terren. Një analist/opinionist flet çfarë ndodh në kokën e tij)

Propaganda e veshur si lajm është tjetër kërcënim për gazetarinë. Eshtë fakt se politikanët dhe qeveritarët tashmë raportojnë vetë nga vendgjarjet madje raportojnë edhe fushatat zgjedhore. Eshtë koha kur politikani bëhet vetë media dhe media e ndihmon duke shpërndarë propagandë.

Një tjetër trend shqetësues është abuzimi me “objektivitetin”. “Ai tha, ajo tha”. Një raportim pa asnjë verifikim mjaft që njëri thotë një budallallëk dhe gazetari në vend që të thotë se cila është e vërteta e ndjen se duhet të balancojë duke kërkuar edhe një budallallëk nga ana tjetër.

Në kushtet e cunamit informativ besueshmëria e medias cënohet edhe nga “tufa” e “ekspertëve/analistëve” që paraqiten si autoritete në fushat përkatëse. Në të shumtën e radhës ke të bësh me njerëz që kërkojnë vëmendje përmes medias dhe që atë që thonë sot e harrojnë nesër dhe atë që thonë nesër e kanë thënë pardje.

Në vend që të ofrojnë analiza të informuara dhe të bazuar në fakte, shpesh ata përhapin opinionet personale, në stilin “kështu ma merr mendja mua” . Në vend të sqarimit mbjellin konfuzion përmes spekullimeve, thashethemeve, dhe keqinformimit. Nuk mbajnë asnjë përgjegjësi dhe mendojnë se “ky popull kaq meriton”..

Ndërsa “Qershia mbi tortë” janë gjobvëniet të paraqitura si gazetari investigative.

Rreziqet që vijnë nga pushtetet e tjera dhe sidomos ai politik ndaj medias janë evidente dhe nuk thua asgjë të re. Por rënia e besueshmërisë së medias (15%) ka ardhur edhe si pasojë e minimit të profesionit nga brenda.

Pa vendosur autokontrollin, media nuk mund të bëhet e besueshme në misionin për të “kontrolluar” pushtetet e tjera.