Lirimi i Tahirit nga burgu, Yuri Kim: Shumë zhgënjyes, do të ketë pasoja…

Ambadadorja amerikane në Tiranë, Yuri Kim, ka reaguar ashpër lidhur me lirimin e parakohshëm nga burgu të ish-ministrit të Brendshëm, Saimir Tahiri.

Diplomatja amerikane paralajmëron pasoja ndaj atyre që merren me dhënien ose pranimin e kërcënimeve dhe nxitjeve, për shembull, për të ndihmuar miqtë e fuqishëm.

“Shumë zhgënjyese të shohësh se mënyrat e vjetra të mosndëshkimit dhe privilegjimit për disa vazhdojnë në Shqipëri në sistemin e drejtësisë.

Këto mënyra të vjetra nuk janë të përshtatshme për një aleat të NATO-s dhe aspirantëve të BE-së dhe ato duhet të refuzohen me vendosmëri.

Shtetet e Bashkuara të Amerikës e konsiderojnë korrupsionin si një kërcënim thelbësor të sigurisë kombëtare. Ata që merren me dhënien ose pranimin e kërcënimeve dhe nxitjeve – për shembull, për të ndihmuar miqtë e fuqishëm – duhet të kuptojnë se veprimet e tyre do të kenë pasoja”, shprehet ambasadorja Kim.

Reagimi ka ardhur pasi Saimir Tahiri, bazuar në një vendim të Gjykatës së Elbasanit, do të kalojë pjesën e mbetur të dënimit, në shtëpi. Gjykata e Elbasanit vendosi lirimin me kusht të ish-ministrit Tahiri, i cili ishte dënuar me 3 vite e 4 muaj burgim për akuzën e shpërdorimit të detyrës.

Vendimi erdhi në një kohë kur Tahiri ka vuajtur tashmë gjysmën e dënimit, ndërsa pjesën tjetër prej 1 viti e 7 muaj do ta kryejë në banesë.

Sipas vendimit të marrë nga gjyqtarja e Elbasanit, Matilda Fetahu, shkaku kryesor i lirimit me kusht ishte fakti që bashkëshortja e Tahirit për shkak të gjendjes shëndetësore nuk mund të kujdesej më për fëmijët. Dhe për këtë arsye, kujdestarinë për fëmijët duhet ta kryejë Tahiri.

Tahiri u mor nën hetim pas përgjimeve të bëra nga drejtësia italiane për grupin e Habilajve që merreshin me kultivimin dhe trafikun e kanabis sativa.

Në fund të procesit pavarësisht dyshimeve për implikim të Tahirit në krijimin e kushteve për trafikun e drogës, gjykata e krimeve të rënda e gjeti fajtor për akuzën e shpërdorimit të detyrës.

Akuzë, të cilën vetë Tahiri për asnjë moment nuk e pranoi, por pamundur dot t’ia provojë drejtësisë.