Prokuroria e Tiranës ka apeluar vendimin duke kërkuar që të kthehet në burg Jehon Breçani, 19 vjeçari, i cili disa javë më parë përplasi një vajzë 23 vjeçare me makinë dhe për pasojë i këputi njërën këmbë.
Të premten, gjykata e Tiranës lehtësoi masën e sigurisë në “Arrest shtëpie”duke liruar nga qelia të riun. Sipas raportimeve, 19 vjeçari kishte marrë dhe vetë dëmtime nga aksidenti.
Sipas Prokurorisë, personi i vënë nën hetim (Jehon Breçani) nuk ka zbatuar rregullat e qarkullimit rrugor dhe për pasojë i ka shkaktuar dëmtime të rënda 23 vjeçares Xhesina Gega.
Aksidenti i rëndë ndodhi më 10 qershor, rreth orës 19:15, në rrugën “Xhanfize Keko”, ku makina luksoze e tipit “Benz”, që drejtohej nga 19-vjeçari, Jehon Breçani, djali i ish-drejtorit të Policisë së Tiranës, Erzen Breçani, ka dalë nga rruga dhe ka përplasur 23-vjeçaren që po qëndronte në trotuar.
