Është liruar nga burgu arkitekti Enio Meçaj, i arrestuar në muajin qershor të vitit të kaluar, si bashkëpunëtor i Artan Tafanit në grabitjen e rreth 30 mijë euro në zonën e Astirit në Tiranë.
Vendimi është marrë nga Gjykata e Shkallës së Parë Kundër Korrupsionit dhe Krimit të Organizuar (GJKKO) me kërkesë të prokurorit të SPAK, Behar Dibra. Në një seancë të mbajtur me dyer të mbyllura, ky i fundit i tha Gjykatës se vepra për të cilën po hetohet Mecaj, ajo e veprimeve që pengojnë zbulimin e të vërtetës, nuk paraqet rrezikshmëri shoqërore, e po ashtu edhe i dyshuari nuk është i rrezikshëm sipas prokurorit.
Enio Meçaj dyshohej se kishte bashkëpunuar me Tafanin, pas grabitjes së pikës së këmbimit valutor, pasi u identifikua nga Policia si një person që i kishte lënë në përdorim garazhin, ku më pas grabitësi kishte fshehur veshjet dhe biçikletën që përdori gjatë ngjarjes.
Grabitësi Tafani, rezultoi më tej nga hetimet se nuk ishte një shkelës ligji i rëndomtë, por pjesë e një grupi kriminal, që ka rrëfyer për drejtësinë disa krime, ku ka marrë pjesë ai vetë apo shokët e tij. Artan (Marjus) Tafani aktualisht mbahet në programin e dëshmitarëve të drejtësisë. Në kapitujt e krimeve që ka rrëfyer Artan apo Marius Tafani përfshin edhe 12 shtetas të tjerë, me role konkrete në 6 vrasje, tentativa krimesh apo shkatërrim prone me lëndë plasëse.
Më i njohuri ndër këta emra është Laert Haxhia, që SPAK e konsideron kreun e një grupi kriminal dhe që prej dy vitesh po gjykohet në të njëjtën Gjykatë të Posaçme për vrasjen e Jurgen Hoxhës dhe Zamir Latifit.
Enio Meçaj është njeri i afërt i Laert Haxhiut dhe ditën e arrestimit ai ka qenë në zonën e “Astirit” në Tiranë. Emri i Meçaj del edhe tek dëshmia e Artan Tafanit, bashkëpunëtorit të drejtësisë, i cili e tregon si pjesëmarrës në grabitje.
Discussion about this post