Policia e Korçës ka mundur të identifikojë dhe të vërë në pranga një 38 vjeçar, i cili të shtunën në mbrëmje hyri me forcë në një bankë të nivelit të dytë në Korçë por pa mundur të marrë gjë, teksa ka qenë live në “Tik Tok”.
Rreth 22:05 të së shtunës Valter Xhelillari u fut në ambientet e bankës, ku qëndroi për disa sekonda dhe më pas u largua menjëherë, sapo konstatoi praninë e policisë, duke mos marrë gjë.
Përpara uniformave blu ai deklaroi se nuk mban mend gjë se ka qenë i dehur: “Unë kam qenë në gjendje të dehur dhe nuk mbaj mend asgjë”.
“Pas kontrolleve intensive që zgjatën 24 orë, Policia e Korçës bëri të mundur lokalizimin dhe kapjen e 38-vjeçarit. Menjëherë pas ngjarjes së ndodhur mbrëmjen e datës 21 dhjetor, në lagjen nr.3, Korçë, shërbimet e Drejtorisë Vendore të Policisë Korçë, në bashkëpunim me shërbimet e Komisariatit të Policisë Korçë, ushtruan kontrolle të pandërprera për kapjen e autorit. Pas identifikimit të autorit të dyshuar, bazuar dhe në inteligjencën policore, shërbimet e Policisë lokalizuan në lagjen nr.6 në Korçë dhe vunë në pranga shtetasin V. Xh., 38 vjeç, banues në Korçë. Më datë 21.12.2024, rreth orës 22:05, 38-vjeçari ka hyrë me forcë në ambientet e një banke të nivelit të dytë, ku ka qëndruar për disa sekonda dhe është larguar menjëherë sapo ka konstatuar shërbimet e Policisë, pa marrë asgjë”, njofton policia.
Discussion about this post