VIDEO – Përplasje në Kuvend, ndërpritet seanca/ Nikolla përjashton Flamur Nokën

Seanca plenare nisi me tensione këtë të enjte, mes kryeparlamentares Lindita Nikolla dhe deputetëve të opozitës.

Këta të fundit i kërkuan Nikollës të lexojë siç i janë dërguar njoftimet e opozitës. Pakica kërkon futjen e Sali Berishës në grupin parlamentar të PD, ndërkohë që Lindita Nikolla e refuzoi.

Në këto kushte, deputetët e PD u ngritën në këmbë dhe bllokuan foltoren. Mes Lindita Nikollës dhe Flamur Nokës pati përplasje verbale.

Kryeparlamentarja Lindita Nikolla vendosi të ndërpriste seancën për 5 minuta.

Me rinisjen e seancës plenare, deputetët demokratë vijuan me bllokimin e seancës plenare, ndërsa kryeparlamentarja njoftoi përjashtimin nga seanca të deputetit demokrat Flamur Noka.

Në kushtet e bllokimit të foltores dhe përplasjeve verbale, Nikolla vendosi sërish të ndërpriste seancën për 5 minuta.

Ndërkohë që jashtë Parlamentit opozita po proteston. Protesta e opozitës vjen pas publikimit të investigimit të dytë të televizionit italian Rai3, për të cilin deputetët e pakicës kërkojnë mocion me debat në Parlament, kërkesë që nuk është futur në seancën e sotme.