Pas fitores bindëse ndaj Comos, Interi rikthehet në skenën europiane me një sfidë shumë më të vështirë: përplasjen në San Siro kundër Liverpoolit, një duel që mund të përcaktojë ritmin e zikaltërve në fazën e grupeve të Ligës së Kampionëve.
Ekipi i Christian Chivu-s synon fitoren e pestë në gjashtë ndeshje, por trajneri shprehet i kujdesshëm përballë një rivali me histori dhe intensitet të jashtëzakonshëm.
“Liverpooli ka cilësi individuale dhe kolektive. E dimë intensitetin e tyre, e dimë çfarë sjellin në fushë. Ne duhet të përgjigjemi me të njëjtën energji,” tha Chivu në konferencë për shtyp. Ai mohoi se përgatitja e Interit lidhej me një individ të vetëm si Salah: “Ekziston ekipi, jo vetëm lojtari. Duhet të shqetësohemi për Liverpoolin si grup, jo për individë.”
Lidhur me gjendjen fizike të Akanjit, trajneri u shpreh se mbrojtësi nuk ishte stërvitur për shkak të shqetësimeve dhe se vendimi do të merret në orët e fundit: “E dërguam në shtëpi, nuk ndihej mirë. Do ta shohim nesër.”
Chivu foli edhe për lodhjen e lojtarëve dhe rëndësinë e ruajtjes së energjive në një sezon të ngjeshur: “Nuk është e lehtë të mbash të njëjtin ritëm kur luan çdo tre ditë. Duhet të dish kur të marrësh frymë pa humbur ekuilibrin.”
Trajneri vlerësoi faktin që Interi po demonstron fleksibilitet taktik dhe mentalitet fitues: “Nuk ndërtoj mure, por ura. Jam i lumtur që lojtarët po e kuptojnë këtë filozofi. Disa herë mund të jetë konfuzion, por kaosi të shtyn të gjesh zgjidhje më të mira.”
Sa i përket objektivave në Champions, Chivu e bëri të qartë: “Qëllimi është të fitojmë gjithmonë. Nëse duhen luajtur eliminatoret, do të jemi gati, por duam t’i shmangim.”
Interi hyn në këtë përballje me vetëbesim të lartë dhe një seri të fortë rezultatesh, por Chivu nënvizon se asgjë nuk mbaron me suksesin e fundit: “Nuk kemi nevojë për certifikata, por për qëndrueshmëri.”
San Siro pritet të jetë i zjarrtë, ndërsa zikaltërit kërkojnë të konfirmojnë veten si një nga skuadrat më të forta të Europës në këtë sezon.
gijotina.com/
Discussion about this post