Liverpool ka triumfuar përballë Leicester City, në takimin e javës së 36-të të Premier League.
The Reds, kryen detyrën duke fituar me rezultatin 3-0, falë dy golave të Jones, në pjesën e parë dhe supergolit të Alexander-Arnold, gjatë 45 minutave të dyta.
Takimi nisi me djemtë e Klopp, si zakonisht, shumë kërkues ndaj një ekipi që rrezikon shumë rënien nga kategoria.
Rezistenca e “dhelprave” zgjati deri në minutën e 33’, ku një asistim i Salah, u shfrytëzua në perfeksion nga Jones, i cili realizoi golin e parë të takimit.
Reagimi i vendasve ishte inekzistent, me Liverpool që dysfishoi në të 36’, përsëri me Jones, goli i të cilit u akordua pas një rishikimi të imtësishëm në VAR.
Me epërsinë e dy golave, “The Reds” shkuan të qetë në dhomat e zhveshjes.
Në fillim të pjesës së dytë, Madison i Leicester Cityt, provoi të ngushtonte diferencat por, goditja e tij u bllokua lehtë nga Alisson.
Ky ishte një nga të paktat raste të bluve, me Liverpool që dominoi dhe gjatë pjesës së dytë, duke mos i lënë iniciativën djemve të Brendan Roxhers.
Në minutën e 70’, Trent Alexander-Arnold realizoi një super gol, duke goditur mjeshtërisht nga distanca, me topin që përfundoi në trekëndësh.
Pas këtij goli, “The Reds”, administruan në mënyrë të përkryer, avantazhin prej tre golash, deri në fund.
Me këtë fitore, Liverpool, arriti kuotën e 65 pikëve, një pikë larg vendit të katërt që të kualifikon në Champions League. Nga ana tjetër, Leicester City, vazhdon të mbetet në vendin e 19-të në renditje, në kuotën e 30 pikëve dhe i rrezikuar seriozisht për të rënë në EFL Championship./m.b /gijotina.com
Discussion about this post