Liverpool merr kryesimin, Slot: Klopp më ka lënë një ekip fantastik

Liverpool ka marrë kreun e renditjes së Premier League pas fitores 2-1 ndaj Wolves, një ndeshje ku “reds” vuajtën jo pak për të marrë tri pikët.

Trajneri Arne Slot ndihet i kënaqur nga kjo paraqitje, por shprehet se ekipi i tij nuk ka dhënë ende maksimumin. Ai gjithashtu është shprehur se puna e Jurgen Klopp te Liverpool ka qenë fantastike.

“Ndaj Wolves ishte e vështirë në fillim, por në pjesën e dytë luajtëm shumë më mirë. Energjia dhe intensiteti ishte shumë më i lartë. Ajo që bie në sy është durimi që kemi. Në përgjithësi ishim shumë më të duruar”, u shpreh Slot.

Duke folur për shanset e Liverpool për të fituar titullin këtë sezon, ai shtoi: “Faza dhe ndeshjet e luajtura në verë na ndihmuan. Lojtarët filluan të besojnë. Ne kemi shumë për të dëshmuar kur hasim me skuadrat pretendente për titull”.

“Është mirë që jemi këtu, në krye të renditjes jemi për momentin, por unë gjithmonë përpiqem të jem realist. Puna e Jurgen ka qenë fantastike. Ne duhet të dëshmojmë se mund ta bëjmë atë në Champions League dhe Premier League”, tha Slot.