Mohamed Salah po kalon një nga sezonet më të mira të karrierës dhe këtë e konfirmojnë edhe statistikat e yllit egjiptian të Liverpool, i cili është në vitin e fundit të kontratës së tij me të kuqtë dhe pritet të largohet në verë.
Të dielën ai shënoi gol dhe dha asist në suksesin 2-0 të Liverpool ndaj Manchester City, duke shkruar rekorde të tjera në historinë e Premier League.
Salah u bë lojtari i vetëm në historinë e kampionatit anglez që është përfshirë drejtpërdrejt në 40 apo më shumë gola në më shumë se një sezon, pasi e ka bërë këtë në edicionin 2017-18 (42 – 32 gola, 10 asiste) dhe sezonin aktual (41 – 25 gola, 16 asiste).
Goli i tij ndaj City ishte i 16-ti në fushë kundërshtare në Premier League këtë sezon; duke barazuar rekordin për më shumë gola jashtë fushe në një sezon të vetëm në kompeticion (gjithashtu 16 nga Kevin Philips në 1999-2000 dhe Harry Kane në 2022-23).
Salah gjithashtu është lojtari i parë në historinë e Premier League që shënon dhe asiston në të dyja ndeshjet kundër kampionëve në fuqi në një sezon të vetëm.
Ai ka shënuar më shumë gola (9) dhe ka dhënë më shumë asiste (6) se çdo lojtar tjetër kundër skuadrave të menaxhuara nga Pep Guardiola në karrierën e tij si trajner në ligat elitare.
Discussion about this post