Pas shpalljes në kërkim kombëtar, ka ardhur menjëherë një reagim nga ana e avokati të Adriatik Llallës, Sokol Hazizaj i cili shprehet se klientit i lind e drejta të kërkojë azil politik, nëse vazhdon trajtimi i çështjes se tij politikisht edhe pas vendimit të gjykatës. Ndërkohë ai nuk ka pranuar të tregojë nëse ka folur me të pas vendimit.
“Nëse një post-gjykim vazhdon diskutimi politikisht, padyshim legjitimohet çdo njeri. Unë nuk kam asnjë informacion për këtë gjë. Nëse vazhdon kjo lloj dileme, ku politika vendos padyshim që njerëzit do të gjejnë rrugëzgjidhje. Nuk e kundërshtoj dhe as nuk e paragjykoj”, është shprehur ai.
Ndër të tjera, teksa ka marrë fjalën Hazizaj pretendon se është padrejtësi nga ana e Gjykatës së Apelit, që Llalla është shpallur në kërkim, ndërsa duhet të sillte vendimin e arsyetuar, përkundër kodit të procedurës penale, pasi sipas tij duhen më shumë se 45 ditë për të bërë rekursin.
I pyetur nëse do të kërkojë azil, ai është arsyetuar se Llalla nuk është pjesë e tagrit, për të kërkuar azil.
“Çështja e mbrojtjes ligjore të Llallës vjen për pasojë të dy momenteve, prokura dhe deklarimi para gjykatës së shkallës së parë dhe të apelit për cilësinë e gjykimit. Për sa kohë ishim në sallën e gjykimit, i mbrojturi prej meje konsiderohet i njoftuar prej meje. Së dyti, për mua në cilësinë e mbrojtësit nuk ka rëndësi fare nëse do komunikoja me të mbrojturin prej meje. Rekursi ka afat 45 ditë. Apeli sot në kundërshtim me Kodin, duhet të sillte vendimin e arsyetuar, përkundër kodit të procedurës penale. Unë duhet të pres më shumë se 45 ditë për të bërë rekursin. Kjo është padrejtësi që i bëhet të mbrojturit prej meje. A do të kërkojë azil? Pse duhet ta dijë kërkesën për azil kur nuk është pjesë e tagrit. Nëse kjo çështje trajtohet politikisht. Sensibiliteti mund ta shtyjë në atë vendimmarrje”,është shprehur ai.
