Kryebashkiaku i Elbasanit, Gledjan Llatja, thyen rekorde kur vjen fjala për abuzimet me tenderët. Kjo bashki përveç se i zhvillon prokurimet në kundërshtim me ligjin, përcakton fonde limit të larta, që rëndojnë në kurrizin taksapaguesve.
Po me të njëjtën metodë është vepruar edhe me tenderin e fundit me objekt “Përmirësim i infrastrukturës kryesisht në zona informale (Rikonstruksion i gjendjes ekzistuese të rrugës “Arif Dardha”. Ky është një projekt afatgjatë, për të cilin parashikohet të shpenzohen miliarda lekë.
Por, këtë herë 500 milionë lekë Llatja pretendon se do t’i shpenzojë për rrugën “Arif Dardha”.
Por ka dyshime se sa nga këto lekë përfundojnë të investuara sipas kontratës. Në këtë tender jepen milionat tak-fak pa rregulla dhe pa garë. Jo se nuk kishte konkurrentë, madje 12 kompani kanë paraqitur ofertat e tyre, por Llatja ia ka caktuar këtë tender mikut të tij Ramazan Kalia. Kështu, kryebashkiaku eliminoi menjëherë nga gara 11 firma, dy prej të cilave kishin ofertë 10 milionë lekë më lirë, dhe la të vlefshme vetëm ofertën e kompanisë “LIQENI VII” SHA.
Mbi tryezën e Llatjes mbeti vetëm zarfi i Kalisë, që u shpall automatikisht fitues.
Ky veprim është në kundërshtim me ligjin për prokurimet. Prandaj, duke vlerësuar riskun e lartë për korrupsion, Open Data e ka shënuar këtë tender me “Flamur të kuq”.
Kështu ndërsa qytetarët presin të shohin investimin, këto 500 milionë lekë do të treten në xhepat e zyrtarëve të korruptuar përpara se të nisë puna për riparimin e rrugës.
Kujtojmë se punimet në këtë rrugë kanë nisur që në muajin prill të këtij viti, pak javë para garës për zgjedhjet vendore që u zhvilluan në maj 2023. Në një takim me banorët, Llatja tha “Kësaj rruge po i bëhet ndërhyrje total për ujësjellës-kanalizime dhe më pas do ndërhyhet me shtresë asfaltike dhe ndriçim”.
Madje kryebashkiaku e publikoi në rrjetet sociale nisjen e punës. Çdo gjë u bë për propagandë, sepse pas punimeve për kanalet kulluese kjo rrugë ka mbetur ashtu siç ishte. Bashkia nuk ka mbyllur as gropat e hapura nga punimet para 6 muajsh.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post