Llixhat e Peshkopisë pavarësisht ujit, që njihet për vetitë kurative, është kthyer në një ambient shumë të papastër, kjo pasi njerëzit të cilët e frekuentojnë i hedhin mbeturinat kudo.
Bashkia Dibër nuk ka marrë asnjë masë për pastrimin, mbeturinat nuk tërhiqen rregullisht. Qentë endacakë janë një tjetër problem shqetësues që enden mes njerëzve.
Edhe njerëzit ankohen për këtë pjesë, madje kërkojnë që të vendoset gjobë për të gjithë ata që ndotin mjedisin.
“Për mua është hera e parë që vij. Ka ndotje shumë të tmerrshme, është maksimale. Duhet të ndërgjegjësohen vetë njerëzit. Vendi është shumë i mirë, por era është shumë e keqe. Duhet të vërë dorë bashkia dhe të gjobisë njerëzit që hedhin mbeturinat. Vetëm ligji e vë këtë popull në terezi”- shprehet pushuesi.
Përveç këtyre problemeve, tjetër është edhe rruga, e cila nuk ndodhet në gjendje të mirë. Rruga që të çon atje është e pa asfaltuar, gjithë gurë, pluhur dhe baltë në kohë reshjesh.
Bashkia e ka parë llixhën si burim fitimesh të majme, por jo si një resurs që sjell të ardhura dhe të investojë për tu krijuar kushte pushuesve .
“Të vish nga ana anës, dhe të rrish në pisllëk është një keqpërdorim. Natyra këtu është shumë e mirë, por njeriu e prish. Madje edhe rrugët janë në gjendje të keqe. Nuk është mënyra për t’i afruar turistët”-thotë një pushuese.
Edhe pse natyra u ka falur gjithë këtë pasuri, shteti dhe Bashkia mbeten po njësoj, pasi nuk kanë ndërmarrë asgjë për t’i rregulluar këto probleme.
